Kat dang lai ki snem ki khynnah kiwa dang pyndep yei puræ wa kiwa sdang puræ leh dang boon ki katwa ki thaw puræ won da chem chitom ki wow ye u pdiang lut ya ki cha ki kyrdan puræ waphær waphær neibhah wa da tam boon ki khynnah bar ya iwa da mang wow em hapoh ki kamra.
Ka Kiang Nangbah Government College (KNGC) man ko kawi na ki College wa e chakri ya ki khynnah ka Ri-loom Jaiñtia waroh kawi wei hadooh kini ki sngi ki khynnah wa ki manbei manpa leh dang kyruiñ ki cha ka wow yoh yei puræ puthi.
Ha kani ka kynti da yoh ya ka yukheiñ na ka KNGC heiwa dang em sa kamwa 667 ngut ki khynnah kiwa da yaleh Admission ha ka BA kiwa dang yang wow yoh Admission hadooh ynne ka sngi.
Ha kani ka College, katkam wa man ynne ka sngi da pdiang lut 59 ngut ki khynnah ha ka B.Com 1st Semester, katwa ha ka B.Sc 1st Semester won da em 234 ngut wei ha kini ki Class ym em de wa dooh Admission.
Ha ka BA 1St Semester ha ka Morning Shift da phiah ya ka ha ki ar Section heiwa ha kawi ka Section da pdiang mar 490 ngut ki khynnah katwa ha ka Day Section wonda pdiang 490 ngut, iwa mut waroh ki khynnah wa da pdiang ha ka BA 1st Semester em ki 1,470 ngut.
Waroh ki khynnah wa da pdiang ka KNGC ha ka 1st Semester ka BA, B.Com wa BSc em ki 1,763 ngut.
Chooh chooh ha u snem 2020 waroh ki khynnah wa da pdiang kani ka thaw puræ ha ka 1st Semester yong ka BA, BCom wa BSc da em ki kamwa 1,500 ngut. Ini pynyoo i wa ha uni u snem ka KNGC da pdiang tam ko sa kamwa 263 ngut.
Hawa yaklam wa ka Principal ka College, ka Dr. Easter Meena Blah da ong ko wa neiliang ka College daw yaleh ko katwa ye u pdiang chooh ya ki khynnah ha kani ka tayaw wow wan.
Hawa yaklam won u Deputy Commissioner ka West Jaiñtia Hills, u LSN Dykes heiyatoh wa i dooh Admission ki khynnah ha ka CLASS XI wa BA hapoh District, neiliang yong oo da pyntip u wa ha ka 20 tarik daw yachem u wa ki heh ka chnat ka puræ puthi hajrong ini khnang wow ye u leh yeiwa emkaam wot wow thoh leh cha ka chnat ha Shillong.
