Ka seiñ All Jaiñtia Muster Roll Workers & Labour Union haka yalang wada pynman ynne ka 17 tarik ha Chiliangraij, Jowai, da maham ko wow mih madan wei kamjooh u lai ujor cha ka yung bichaar lada ka sorkar ym pynkrehkaam ko wut wut yei hok wa toh u yoh ki, itæ wow pynku ya ka bai nong, iwa ar wow pynkrehkaam yaka Meghalaya Regular Casual Worker Scheme 1996.
U President ka seiñ u K.L. Pariat khana u wa neiliang ka seiñ nadooh u snem 2018 da em ka yalang wa u montri wa pait yaka chnat Labour wei da dawa leh ya kini ki phang, tangwa ka sorkar ym ap ko.
Tangwa ynnin ka sngi hawa u MLA ka Nongpoh da wanrah u wow yaklam hapoh ka yung dorbar chna aiñ, hadien ini ka sorkar sdang ko wow khyrngiat wa toh i hok yong ki wakreh Muster Role wa kiwa kreh mylla.
Hajrong ini i wanrah yaklam u MLA ka Nongpoh, u K.L. Pariat da sñiawngooh u wa em u yei mynsien u pyrkhat neibynta kiwa kreh mylla sngi.
Hapoh ka Meghalaya Regular Casual Worker Scheme 1996, ong ko wa kitu ki wakreh palat yaka 10 snem toh u yoh ki ya ka 4th Grade Post iwa ye u man hei kaam Chowkidar wa Peon lada em wa lait kaam.
Heiyatoh wa ka Revise Wages namo wow pynthymme ya ka nong sngi, u K.L. Pariat ong u wa katkam ka Minimum Wages Act 1951 da klam che ko wa ki wakreh mylla toh u yoh ki yei pynku bai nongsngi arsien chi snem ka wow krehkaam haka 1 tarik Naitung (April) wa haka 1 tarik Naichiphaw (October), tangwa neiliang kiwa kreh Muster Roll wa kiwa kreh mylla sngi khyrngiat ki wa hadooh katni da jan poi sa ka bynta wa ar haka 1 tarik October leh ka sorkar suki bait ko wym tip iyi i daw.
Chooh chooh iwa pynsñiaw yaam rem ya ki toh wa wot ki sahep sorkar, ki Engineer yong ki chnat krehkaam hapoh Ri-loom Jaiñtia leh ong ki wa kam kani ka Scheme wym jooh em.
Da ong wa hei sakhiat neiliang ka sorkar toh u e sikai ko ya ki Scheme wa em ha ki chnat krehkaam ka sorkar khamtam ha Jaiñtia Hills khang wa ki Scheme ym sepai ki.
Da kylli u leh ya u Montri wa pait ya ka chnat Labour kamjooh ya u Montri Rangbah deiwa ong neiyi i daw wa mut ko u pyndooh noh yei hok kiwa kreh mylla.
“Lada ka sorkar ym leh ko iyi iyi hadooh ka 01-10-21, kani ka seiñ da rai ko wow mih madan, wei hadien won ini lym yoo iyi iyi wa leh ka sorkar, wym banse wot u lai chaka yung bichaar,” da ong u Pariat.
Ha kani ka jooh ka sngi da em leh i pynsñiawthooh hajrong ka Scheme e-SHRAM wa kam ki wakreh mylla ye ki u pynpsiah pyrtuid neibynta u yoh myntoi.
