Ka sngi khaddooh ka Dorbar Synrai ka Meghalaya Assembly da wanrah ko ya iwa chit bha i ya kylliang ktien hapyrdi ka liang pyrchah ka Congress wa ka National People’s Party (NPP).
Du hadien wa dep u Montri Rangbah wow jubab ya ka ‘Short Duration Discussion’, uwa wanrah ya kani ka phang, u Zenith Sangma da yieñ u wow pynbaad ya u Conrad deiwa ong wa da jubab u deiwa pynskit hi-eh khlem da khana yei yong sakhiat deiwa ong leh wa u Montri Rangbah uwa myllieñ wow leh ya ini.
U Zenith da pyrchang leh u klam ya iwa da pynmih u Phulbari MLA, u SG Esmatur Mominin heiyatoh wa iwa jia yasiat ha MBoSE ha u 2005, deiwa ong wa ini toh iwa da kut da khang wei hadooh ka Judicial Inquiry toh kawa da pyndep.
Deiwa chrai ya ini i rukom klam u Zenith ya u Montri Rangbah, u Government Chief Whip, u Marcuise Marak da yieñ u wow kylli ileh wa ka liang pyrchah tieñ ko wow klam ya ini wa jia ha MBoSE.
Deiwa chrai, u Zenith da ong u, “Ym em tieñ u wow yaklam. Lada tieñ O wow yaklam da suki hi-eh O.”
Yow wanrah yei ryntih i yaklam, uwa yahkhmat ka liang pyrchah da ong u wa du ki dkhot kiwa da chimbynta chwa ka ka yaklam kiwa ye u yatai deiwa paan pynche wa kammon u Marak u wym em chimbynta ha ka Short Duration Discussion da chimbynta syndet u.
Neiliang u Montri Rangbah da tuklar u deiwa ong wa bha wow pynkut noh ya ka yaklam wei kam ki dkhot wa em yei kitkhlieh ym emkaam de wow yaklam ya ini.
Neiliang won u Deputy Chief Minister, u Prestone Tynsong da ong u wa ini toh i sien wa nyngkong wa ka ‘Short Duration Discussion’ kawa toh u klam chibet chipor donhi da chimpor ko palat 2 kynta chiteiñ.
U Tynsong da ong u wa katkam ki kyndon, ym toh u chimpor ko palat 2 kynta chiteiñ.
