U President thymme ka Meghalaya Pradesh Congress Committee (MPCC) uwa man leh u MP ka Shillong, u Vincent H Pala da ong u wa kopsar u Dr. Mukul Sangma ym sñiawsuk u nga itæ i daw ym poi u wow chimbynta ha ki ar tylli ki yalang ka Congress.
Ka Congress ha kani ka tayaw da pynman ko ya ki 2 tylli ki yalang, kawi ha ka 16 tarik heiwa da pdiang sñiawbha ya ki 5 ngut ki dkhot wa thymme cha ka party, wa kynthup ya u RG Lyngdoh wa u PN Syiem kiwa man ki MLA warim ka Party, wei ynne ka sngi kawa da chimkti u Vincent kam u President wa pura ka MPCC, wei wa ha ki ar tylli ki yalang kiwa heh ka Party, u heh ka Congress Legislature Party wa ki MLA na Garo Hills ym em u wan ki.
Hadien ka yalang ka MPCC ynne ka sngi, u Vincent da ong u wa i daw wym em u wan u Dr. Mukul cha ka yalang kopsar ym em u sñiawsuk u oo, tangwa da ong u leh wa daw pyrchang syllok u wa u Montri Rangbah warim, katwa ye u.
U Vincent da ong u leh wa oo ym kwah u wow murieh iwon iwon wei toh i kaamram yong oo wow yachem markhmat wa u Dr. Mukul, wei ha kini ki sngi wa dadep leh da pyrchang yachem u tangwa nei boonkaam wei i em ka dorbar ym em u yohlaad u wei da pynrap u wa daw kheiñ bait ya u Dr. Mukul kam u Boss ha ka Party wei kam u lok wa yajan.
Chooh chooh da ong u wa kam uwa yahkhkat ka Party daw lai u cha waroh 60 tylli ki Constituency, wa cha Garo Hills yow paan yumut u na ki heh ka Party na ka thaaiñ wa kynthup ya u Dr. Mukul, u Zenith Sangma, ka Deborah Marak, u Salseng Marak wa kiwi kiwi.
