Ka Shillong Press Club (SPC) da chimkhia wei da sñiawiñ ko yeiwa chah klam pynkhor wei chah tba kti uwi na kiwa thoh khubor uwa da heh da kreh slem uwa da lai cha i thaw chong kyllaaiñ myngngor wa pynman da ka KSU, FKJGP, HNYF wa RBYF ha i thaw wa em u mot sahnaam u Kiang Nangbah ha Barik ynne i step.
I smat wow tuklar da kiwa yahkhmat kitai ki seiñ wei hadien wa yaklam wa u President wa u General Secretary ka SPC da poi chei sñiawthooh heiwa daw thooh ya kiwa emkti yow leh yeiwa emkaam.
Ka SPC da pynsñiaw ko leh yei sñiawngooh yei smat kiwa pynman yei yakhih wow beiñ paidbah ya kiwa emkti ha ini i kaam wei wow paan maap leh na uwa thoh khubor pyn ha ini i thaw hi. Ka SPC da yaroh ko leh ya kitu ki khynroo kiwa da wan smat yow beh ya kini ki thmu wow leh sih wei da lait leh na iwon iwon i mynsoo ya uwa thoh khubor.
Ka SPC da ong ko wa ini ym toh i sien wa nyngkong wa hap wow pynmih ya kam kini ki jait khubor wei da rai kut leh wa ym toh wow e laad wa neini chakhmat daw hap pynmih biang ya kam ini da ka seiñ kiwa thoh khubor. Chooh chooh da ong wa ini i jia da pynyoo wa ym em wa pyrkhat ya kiwa thoh khubor kiwa da booh yei kaam yong ki hakhmat deiwa khlem pyrkhat de ya i chngaaiñ yong idæ heiwa kiwa boon daw sah ki hei doom lada ym yoh ki ya ka khubor wa man sakhiat.
Kamtæ ka SPC da ong ko wa neini chakhmat daw man i iwa eh wow maap lada kam kini ki kaam pynkhor, ki chah maham u pteiñ ki kamjooh lada em kiwa khanglaad wow leh yei kaam yong kiwa thoh khubor.
Da pynkut deiwa ong wa u pteiñ hi wow leh yei kaam neibynta i bha i miat yong waroh hapoh ka jylla deiwa kyntu ya kiwa emktilang wow ya krehlang ki yow lait nei pynthut yei suk i saaiñ.
