Ka JSU ynne ka sngi lyngba ka dorkhat wa da thoh cha u Director yong ka chnat puræ puthi ka sorkar jylla lyngba ka Joint Director yong ka West Jaiñtia Hills District, da e yumut wa neidaw wa khynnia ki skur sorkar neibynta ki Class XI wa XII, da toh u booh da ka Evening lane ka Morning Shift, neitæ da dawa wow pynheh ya ka Kiang Nangbah Govt. College lane deiwa booh da ka Extension deiwa chna sa ha East Jaiñtia Hills District, heijooh i por wow thung ya kiwa sikai deilang i su (Fixed Pay) khnang yow ye u chakri hei puræ puthi.
Ka seiñ da dawa haroh ko wow pynku kyrdan ya ka Rymbai Govt. Secondary School kawa em ha East Jaiñtia cha ka Higher Secondary School, najrong wow chna leh ya ka College sorkar wa pura ha East Jaiñtia Hills District.
Heijooh i por ka seiñ lyngba u General Secretary u T. Suchen wa u Education Secretary u E. Pohtam da dawa ki ya ka sorkar lyngba ka chnat pure puthi wa hapoh chitayaw toh u pdiang ya ki spah ngut ki khynroo khyllood wa da duh thaw puræ hapoh ki skur wa College sorkar.
