Ye em khana u Dolloi ka Nongjngi cha ka Village Court yeiwa phah bichaar ka JHADC

Ki dkhot yong ka Village Court ka Nongjngi Elaka ha ka khubor wa da phah da ki ar ngut ki dkhot yong ka u Riyoo Pulang wa u Kiton Samati, da ong wa hadien wa da yoo ki yei leh mylliñ u Dolloi ka Elaka u Copiousness Daw dei wym pyntip u yeiwa phah ka District Council wow bichaar ya i kaam ka chnong Namdong-A wa u Romario Sungoh wa i thaw wa pyrtuid Lamanang kawa em hapoh u pood u ang ka chnong Namdong-A, Raij Namdong, Nongjngi Elaka.

Da ong wa kam ki dkhot hadien wa da yoo ya ini i pyrchah ka chnong ya ini wym leh iyi iyi u Dolloi, da dap dei lyngngoh neibhah wa kam ki dkhot ym tip ki iyi iyi hajrong ka chithi wa phah da ka JHADC nadooh ka 19-08-21 lyngba u Revenue Officer ka JHADC. Da pynbaad wa u Dolloi kam u Chairman da murieh u ya ini hao samen ya ini i kaam wei ye u man wa ye u em iyi re iyi wa uni u Dolloi da leh u hajrong ini, neibhah kamwa da yoo cha ki khubor wa uni u Dolloi ym em ap u yei ujor yong ka chnong wei ym em lai u leh lyngba ka chnong hajrong ini i kaam wa da leh sop sop u, wei hawa kylli na kiwa kitkaam chnong, uni u Dolloi ym em ap u yei pyrchah yong ki.

Heijooh i por dap ki dkhot ka Village Court dei lyngngoh wa uni u Dolloi nood u wow tyrwa (Recommend) hadooh le tylli ki LHC kiwa da yaleh da u jooh u bru kiwa da heh da ki phaw Acre heiwa uni u bru da em u ya ka Patta kawa heh du 4548 Square Metre kawa da dep wow pyndam (Cancel) wei da thmu wow kylla cha ka LHC tangwa da lyngngoh wa uni u Dolloi na kani ka Patta kawa du katni da nood u wow tyrwa dawa heh da ki phaw Acre kiwa man leh ki thaw yong ka chnong Namdong-A.

Kamtæ hajrong ini, kam ki dkhot ka Village da beiñ joor ki ya ini i leh embor uni u Dolloi ya ki thaw ki bhaw ka chnong du wow myntoi samen.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da kyntu leh ya kiwa em hei bor wow bichaar bniah ya ini i kaam neibynta wow wanrah yei chongsuk chongsaaiñ ha ka imlang sahlang.

Chooh chooh da ong wa uni u Dolloi da leh mylliñ u ya ki dkhot ka Village Court wei ym jooh ap u leh yei e yumut khamtam ya ki kot ki sla wa dang sah cha u Secretary ka Village Court uwa da khlaad noh nadooh kini ki bnai wa da dep wei chiboon ki mukotdum kiwa uni u Dolloi leh u samen khlem da ya phyllu lang wa ki dkhot wei ini i leh samen yong oo da wanrah chiboon i kulmar ha ki chnong ki thaw.

Puræ leh: Pyrchah ka Namdong-A yei pynkylla pyrtuid u Dolloi ya ki thaw ka chnong ha ka LHC