U Montri ka sorkar pyrdi wa pait ya ka chnat Social Justice and Empowerment, u Dr. Virendra Kumar ynne ka sngi da ong u wa ka Ministry yong oo toh kawa da kreh yow pynman ya ka imlang sahlang kawa kdup ya kiwa em hei duna i doh i pran. Neiliang u Montri uwa da wan cha Shillong da yachem u leh wa ki heh ka chnat Department of Social Welfare deilang wa ki NGO.
U Montri da ong u wa kiwa em i duna hei doh i pran man ki kiwa emkaam kam ki bru wakreh ha ka imlang sahlang. Da ong u leh wa ka Ministry da kreh ko leh ya ka thong ‘Sabka Saath Sabka Vikas’ u Prime Minister Narendra Modi, wei da pynkrehkaam ko ya kiwi ki Social Welfare Scheme yow pynman ya ka imlang sahlang kawa bha neibynta kiwa duna hei doh i pran. Da kdaw u leh ya ki kreh wa da leh da ka Ministry ha ki 7 snem wa da dep, heiwa da e sikai yow man kiwa duna hei doh i pran kiwa laitlooid kiwa ye u yieñ dei bor yong ki hi.
Da khana u leh wa da pynman ya 10,000 tylli ki Divyang Camp nadooh u 2014 hapoh ka ri, heiwa 20 klur ngut ki Divyang (kiwa duna hei doh i pran) da yoh yarap ki da ki tiar ki tar wa chongdor T. 500 Klur. Heiytoh wa ki Drug Rehabilitation Centres wa ki Old Age Home hapoh ka ri da khana u wa da booddien bha ya kini yow pyntikna wa da e ki yei sumaar wa biang.
U Montri da lai li pait u leh ya ka Kirpa Foundation wa em ha Upper Lachumiere, Shillong heiwa da yaklam u leh wa kiwa chah sumaar.
Hawa khana ya kiwa boon ki Scheme kiwa da pynkrehkaam da ka sorkar India neibynta kiwa duna hei doh i pran, u Montri da yaroh u yeiwa da pynyoo ya u soh i jop ha ka Tokyo 2020 Paralympics kawa dang dep pynman heiwa da yoh ki 19 tylli ki takma wa kynthup ya ki 5 tylli ki takam ksiar, 8 tylli ki takma rupa wa 6 tylli ki takma tama. Kamtæ da ong u wa ka sorkar kawa katni da chimkhia ko ya ki kaam yaleh Sports yow booh ya ki chlem e sikai wa kyrpang namo ki Special Sports Training Institute du neibynta kiwa duna hei doh i pran ha kiwa boon ki bynta ka ri wei daw em leh kawi ha Shillong.
Heiyatoh wa ka aiñ “The Rights of Persons with Disabilities Bill-2016” da khana u wa da kheiñ lang katni ya 21 tylli ki jait duna hei doh i pran deiw pynku na ki 7 tylli ki jait wei da pynku naka 3% cha ka 4% i bhah neibynta u yoh kreh kiwa duna hei doh i pran ha ki chnat ka sorkar pyrdi wei 5% ha ki thaw puræ puthi.
Hawa klam won heiyatoh wa i dih ya ki jait pynmuaid namo ki Drugs, da ong u wa ini da ktah ko ym du ya uwa dih, kamjooh leh ya ka yung ka sem wa ka imlang sahlang waroh kawi. Hawa pynsñiaw won yei sñiawkhia ya ki jylla ka Northeast kiwa em pood wa kiwi ki ri wa da pynemkaam wow pynlai yaw ya ki Drugs. Da pynsñiaw u yei sñiawkmen wa ki sorkar jylla da ye ki wow yaleh pyrchah ya ini, deiwa khut ya ki wow kreh chitom chooh chooh yow lait ki khon khynroo khyllood wow chah ktah. Da ong u leh wa toh i kamram yong uwi pa uwi wow pynsñiawthooh yei ktah i Drugs.
Ha kani ka yalang da em leh u Secretary ka North Eastern Council, u K Moses Chalai, u Principal Secretary ka sorkar Meghalaya, u Sampath Kumar, ka M N Nampui, Commissioner and Secretary ka sorkar Meghalaya, ki sahep ka chnat Social Welfare wa ki NGO wa kreh neibynta ka chnat.
