Kam chibynta wow pyndooh yei ngait wa em dawai ki reiñ kyndad kamjooh wa ye u chna dawai na ki wei wow yaleh pyrchah leh yei tynyap pyrchah ya ka aiñ ya ki kyndad yow dai ya ki reiñ yong ki, ka sorkar Assam ynne ka sngi kawa man leh kam ka World Rhino Day da thang ko ya 2,479 ki reiñ kyndad kiwa da yoh kem.
“Ynne ka sngi toh ka wow sahkynmoo ya ka Assam wa ka India. Da chim i ya kani ka laad wa phær wow thang ya 2479 tylli ki reiñ kyndad, kawa man leh ka sien nyngkong ha pyrthai wa thang hadooh katni tylli, kam ka thong u PM Narendra Modi yow pyndooh jait noh ya ini i kaam,” da ong u Montri Rangbah ka Assam, u Himanta Biswa Sarma.
U Sarma da pyntip u wa ka sorkar Assam daw pynneh pynsah ko ya 94 tylli ki reiñ kyndad kiwa daw pynyoo rong ha ka Museum kawa daw booh ha Kaziranga National Park.
“U kyndan wa chi reiñ (One-Horned Rhino) toh uwa man kam chibynta yong i, wei kam ka dak wa tipmit ya i. U pynneh pynsah i ya 94 tylli ki reiñ kyndad yow pynyoo rong ya ki ha ka Museum kawa daw sdang ha Kaziranga National Park. I pynemkaam ya ka ki reiñ kyndad kam i dawai toh i ngait biej,” da ong u Sarma.
Ha ka 16-09-21, ka sorkar Assam da pynbna ko wa 2,623 tylli ki reiñ kyndad toh kiwa da yoh kem ka sorkar, 2,479 tylli toh kiwa daw thang, 94 tylli toh ki wow pynneh pynsah katwa 50 tylli da ksoh neidaw wa em mukotduma ki kiwa dang em hapoh ka yung bichaar.
