Kam chibynta wow pynkut ya ka Rashtriya Poshan Maah 2021, da pynman ya ka Poshan Mela ynne ka sngi ha ka pchem ka yung krehkaam u Deputy Commissioner, East Jaiñtia Hills District, Khliehriat wei da pynman ya ka da ka District Programme Officer, ICDS Cell, Poshan Abhiyan, East Jaiñtia Hills District, Khliehriat chirup wa kiwi ki chnat.
Ha kani ka sngi u montri ka chnat Transport Department, u D. Lamare, da yaroh u ya i kreh chitom ki bor District wow pynkrehkaam ya ki Scheme wa ki Programme ka sorkar heiwa da kyntu u ya waroh wow chim kabu ya kini ki Scheme ka sorkar jylla wa sorkar pyrdi.
Da kyntu u leh ya ki paidbah wow krehlang chirup wa ki chnat kamjooh ki sahep wa ki wakreh sorkar heiyatoh wa i pynkrehkaam ya ki Scheme wa ki Programme.
Kam u symbood kongsan, u Kyrmen Shylla, uwa man u Montri ka chnat Social Welfare Department da pyntip u wa ka Rastriya Poshan Maah (Nutrition Month Programme) toh kawa da lehkmen ha waroh kawi ka ri wow pynsñiawthooh hajrong i myntoi yong ki baam wa tei hapyrdi ki kynthai wa ki khynnah.
Da ban joor u leh hajrong i emkaam wow chim ya i tika yada COVID-19 wow yada pyn ya-idæ na i chitom lada jia wa chah ktah ha uni u khñiang.
Ha kani ka sngi da lai pait leh ya ki thaw pynyoo rong (Stalls) ki chnat kam ka Social Welfare Department, Superintendent of Fisheries, Health Department, AH & Veterinary Department, District Swachh Bharat Mission wa ka Meghalaya State Rural Livelihood Society.
Kiwi kiwa da klam ha kani ka sngi toh ka D.M. Suja, Addl. Deputy Commissioner, East Jaiñtia Hills District, ka Dr. R. Toi, M&HO I/c Sutnga CHC, ka Y. Najiar, District Programme Officer, u Shiningstar Rymbai, District Co-ordinator, Poshan Abhiyaan, u Teibor Kyndiah, District Child Protection Officer, East Jaintia Hills District wa ka C. Pale, Child Development Project Officer, ICDS Khliehriat Project.
