Ka yung krehkaam u Director General of Police, Meghalaya da e jubab ko hadien wa mih khubor wa ong wa da em ki pulit kiwa da chong ngiah kiwa em le ngut kiwa da thoh chithi cha u payu u Cherishsterfield Thangkhiew yow dawa takit da ka CBI yeiwa jia ya u Cherish wei ha kani ka chithi da kdaw ya iwa jia yei chah siat yap u Fullmoon Dkhar deiwa ong toh wa siat ya oo da u heh pulit, u Mukesh K Singh heiwa ya ka chithi da phah hei pyrtuid ‘Ka Sur Ki Pulit Ba Lah Shongthait’ wei najrong ini da daw leh ya kiwi ki kaam.
Kamtæ u DGP da pynche u deiwa ong wa waroh kini ki pynbaad toh iwa thok suda neibhah ki heh pulit wa man ki IPS Officer-u Jagpal Singh Dhanoa wa u Shailendra Bamaniya ym em lai ki wow tynyap ya u Thangkhiew kamwa da pynbaad heiwa ha ka 13-08-2021 da lai yow kem neibhah da biang ki sabut wa emkti u hei tympdung IED Bomb ha ka Khliehriat Police Reserve ha ka 14-07-2021 wei da yoh yutip wa biang wa hapyrdi ka 10 hadooh 12 tarik u Naisaphra, 2021 wa emkti u wow sooh buit yow tympdung IED Bomb ha ka 13-08-2021 ha Shillong wei lada ym yada, da jia chooh chooh kiwi iwa ye wow ktah yei mynsien bru wa ki thaw ki bhaw. Da ong leh wa u Cherishsterfield Thangkhiew da emkti u wow dawa poisa na ki MDC wa kiwi ki bru yow yoh poisa yow chna ya ki IED Bomb neibynta ka HNLC kam u bru wa da chong ngiah na kani ka seiñ.
Chooh chooh da ong wa i thmu ki pulit toh wow kem smat wei wow takit ya u Cherishsterfield yei thmu wow tympdung Bomb biang. Kamtæ ym man wow pyntip chwa deiwa e Notice ya u Cheristerfield. Wei da emkaam wow lai kem ya oo deiwa khlem pynbna yow lait u wow pyndooh pynwiar ya ki sabut wei yow lait u wow yut. Wei ya ini i rai da chim da kiwa em ha khlieh dooh hadien wa da pyrkhat chwa ya ini.
Kamtæ i ong wa i tynyap ya u Cheristerfield Thangkhiew toh deiwa phah hukum toh i thok suda. Wei i yap u toh neidaw wym bien u ya krehlang wa ki pulit wei da pyrchang u wow tba kti ya ki pulit hadooh wow pynmynsoo ya ki iwa da pynman ya ki pulit wow siat ki chi kuli yow yada ya idæ. Da ong leh wa lada toh wa yoh u kem ya u Cheristerfield Thangkhiew, da yarap ko wow wanrah ya ki dkhot ka HNLC wow wan ki chakhmat wei toh du ini donhi i thmu ki pulit ha ka 13-08-2021.
Ya waroh ini i pynche neilaing u DGP ye phi wow Download heini.
