Ka JSU hapoh i yahkhmat u General Secretary ka JSU Shillong Circle u Request Pakma wa u Eddy Kerry Pohtam uwa man leh u President ka JSU War Jaiñtia da lai yachem ki ya u Executive Engineer ka Jowai Central Division hajrong i sih ware u sarokbah National Highway 44 wa u NH-44 (Extension) heiwa da chah ktah ware ki paidbah khamtam kiwa em hei chitom.
Ka JSU ka dap ko dei phylla hajrong i saitkti ka PWD Jowai Central Division wow chna pynmiat ya uni u sarok neibhah wa u Executive Engineer da ong u wa neiliang yong ka NHIDCL daw khut Tender ko neini wow pynmiat ya uni u sarok.
Hajrong iwa kylli u Request Pakma lada em i soi wow ekti u chna ya u sarok cha ka NHIDCL, u sahep da pynche u wa ym em kawon kawon kam kani ka rai wei neiliang u Executive Engineer da ong u wa da em i lai pait teiñ ka NHIDCL khlem tip ka chnat PWD wei ka sorkar na Delhi ym em de u e ko ya ka bhah neibynta wow chna pynmiat ya uni u sarok heiwa da yoh dang du ki Minor Repairing.
Hajrong ini, ka JSU da kylli ko ya ka PWD cheiwon wiar ka Minor Repairing yong ka PWD Jowai Central Division wei da e wyrta ko cha ki 7 ngut ki MLA ka Ri-loom Jaiñtia iyi wa da leh ki neibynta i eh i khoo ki paidbah kiwa lai luti na uni u sarok.
Chooh chooh ka seiñ da kyrpaad ko na ka sorkar wow chna pynmiat noh ya uni u sarok NH-44 khnang wa ym ktah u yei lai i wan ki paidbah.
