Ynne i step ka 3 tarik, ka Khynroo Khyllood Committee, Seinraij Jowai da pynkhooid ki ya u Mot Phran wa em ha Madan Siatthong Iawmusiang, iwa man leh kam chibynta i lehkmen dap 75 snem ka ri India.
Uni u Mot Phran wa em ha Iawmusiang, Jowai toh uwa em yei pyrtuid ki bru kiwa na Ri-loom Jaiñtia kiwa da lai cha France iwa heitu i por wa tip kam ka thma France kamtæ mih noh i kyntien Phran cha i, heiwa ya kani ka thma toh kawa da tip hadien kam ka thmabah wa nynkgong.
Kiwa da lai cha kani ka thma na Ri-loom Jaiñtia da em ki kamwa 500 ngut hei sien wa nyngkong wei da poi ki ym du cha France tangwa wot cha Mesopotamia (katni Iraq, Kuwait).
Kam uni u Mot Phran da em waroh le tylli hapoh ka jylla uwi ha Shillong, Jowai wa ha Tura yow sahkynmoo ya kiwa na Ri-loom Khasi, Ri-loom Jaiñtia wa Ri-loom Garo kiwa lai chimbynta ha ka thmabah wa nyngkong kiwa ymye u ong deiwa tikna katwon ngut kiwa lai wei katwon ngut leh kiwa yap neidaw wym em biang booh pyrtuid ki pharæng.
