U Montri ka chnat Puræ Puthi ka jylla, u Lahkmen Rymbui hajrong i chem chitom ki khynnah wow yoh thaw puræ (Admission) ha ki thaw puræ sorkar ha Jowai kamwa da sakhi ha kini ki sngi wa dadep, da pyntip u wa da chong yalang u wa ki heh ka chnat ha ka 30 Naikhynde wow pait yeiwa sakhiat, heiwa da chem wa ki khynnah wa da pyndep (Pass) ha Ri-loom Jaiñtia em ki kamwa 5791 ngut katwa ki Admission wa da e won em ki 6,113 ngut wei ymye u tip neiyi i daw wa dooh thaw puræ ki khynnah neibhah ye u em i pyndap ha ki ar thaw le thaw (Multiple Application) tæye u em ini i eh i khoo.
Chooh Chooh da ong u wa na ki 5791 ngut ym duna ya 500-600 ngut kiwa yoh Admission cha kiwi ki thaw katkam i yoo yong oo, wei mynstep ka 4 tarik daw chong yalang biang yow chemdien yeini i chem chitom ki khynnah.
Heijooh i por da ong u wa ha Ri-loom Jaiñtia da em ka Jaiñtia Eastern College, Shangpung College, ka Kiang Nangbah Government College wa ka Nongtalang College kamtæ ym em chitom wow yoh thaw puræ wa ki laiñ puræ, heiyatoh wa ka Higher Secondary School Science Stream da ong u wa da em ki skur kam kawi ha Sohkha, Marian Hills HSS, wa kiwi kiwi wei wot ki Commerce wa Arts leh da em, kamtæ ymtoh u dooh Admission ki khynnah.
Da kyntu u ya ki khynnah wa ymtoh u lai ware cha sor wow lai puræ, neibhah wa ka Result na kiwi ki skur wa College leh miat hi ki wei emkaam wow pait ya ki thaw puræ wa em hajan khamtam wa em ka khlam COVID-19 wei la puræ heiwon heiwon leh chong ha i mon samen wei heitæ u yoh yei stat.
U Lahkmen da ong u leh wa ka sorkar ymye ko u kyntait næ pyndooh yei stat i tip næ u dooh Admission ki tangwa ymye leh u yoh ha ki thaw wa kwah ki.
