Ki wakreh ka Lakroh MHEP ha ka 1 tarik uni u bnai da yoh pynlait ki ya kawi ka khon Khla-sim (Leopard Cat), wei ya kani ka khon khla da pynlait da u Dapmon Pohtam heipor wa dang pynkhooid u ya i pchem kani ka thaw pynmih bordiñ ryngkat wa u Eddy Kery Pohtam Lakroh, wei da lai ekti noh ya kani ka khon khla cha yung krehkaam ka Forest ha Jowai.
U Eddy Kery Pohtam uwa man leh u President ka Jaiñtia Students Union-War Jaiñtia Circle da ong u wa da dap dei sñiawkhia yei yap khiar ki mrad khloo khamtam kiwa da jan doohjait na ka thaaiñ deiwa kyrpaad joor ya kiwa chong chnong wow kiar wei wow sangeh noh u siat wei wow tynyap ya ki mrad khloo.
Neiliang u F. Passah, Range Officer I/c Wildlife Wing, da ban joor u wow pyntip cha ka chnat wa ka yung krehkaam ka Forest khnang wow tip u kheiñkor wei wow sumaar wei ymtoh wow tynyap ya ki mrad khloo wei kamjooh leh wow tip chaphang ka Wildlife Protection Act 1972 kawa em ki kyndon wow pynchitom ya ki bru wa tyngkheiñ aiñ.
