Booh mooyurim u Vice President yei pynchna ya u sarok Shillong-Dawki

U Vice President ka ri, u M. Venkaiah Naidu, ynne ka sngi da ban joor u yei emkaam wow yoh ya ki sarok wa miat wa bha yow pynyabi ya ka thaaiñ Northeast waroh kawi kamjooh yow ye u chim kabu ya ki kaam uiñke suwari wei yow suk leh u pynpoi ya ki mar ki mata wa kiwi kiwi de yow pynku pynroi ya ka thaaiñ waroh kawi.

Heiyatoh wa ini, u Naidu da khut u yow pyndep smat ya ki kaam pynroi ha waroh kawi ki jylla ka Northeast, deiwa pynemkaam hok ya ka poisa wa da poi na ka sorkar pyrdi. “Lada ye u pyndep smat ya kini ki kaam khlem slem, khlem pynlai cha wi, ki jylla ka Northeast em ko yei laad wow man kam ka kor wa ngiat ya ka ri chakhmat,” deiwa pynrap wa i ku i paar ka ri ym man ko kawa pura lada ym ku ka Northeast deilang.

Da pynsñiaw u leh yei kmen wa da duna ki kaam ki seiñ kieñ suloi katni, deiwa ong wa i suk i saaiñ toh iwa emkaam yow wanrah yei roi i paar.

U Vice President da ong u ya ini ha ka yalang booh mooyurim yei chna pynmiat, wei chna pynheh ya u sarok Shillong-Dawki (National Highway 40) wa da pynman ha Shillong. U Naidu kattæ dang em u hei lai uiñ ya ka thaaiñ Northeast, wei da poi u ha Meghalaya ynne ka sngi.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong u leh wa i chna sarok ha ki thaw wa man loom wa kiwa boon slap ym toh iwa suk, kamtæ da khut u wow thooh ya ki buit thymme hawa chna sarok deiwa pynduna leh yei por wa lut hawa leh ya ini.

Da yaroh u leh ya ka PRIME Hub kawa da sdang ha Meghalaya yow e yarap ya ki bru wa seiñ khih. Da klam u leh chaphang u chirmit Lakadong wa u syiñ wa da pynmih napoh ka jylla kiwa man ki laad kamai ya ki bru.

U Vice President da e khublei u leh ya ka Rebecca Vanessa Suchiang, kawa da emlang ha ka yalang kawa man leh kam ka kynthai nyngkong wa man jaitbru ri-loom ka jylla wa yoh u man kam ka Chief Secretary ka Meghalaya. Da ong u wa ini daw e mynsien ko ya kiwi ki khynroo khyllood ka Meghalaya wow jied ya ini i jait kaam. 

Ha kani ka sngi da emlang leh u Lat ka jylla, u Satya Pal Malik, u Montri Rangbah, u Conrad K. Sangma, u Symbood Montri Rangbah, u P. Tynsong, ka Rebecca Vanessa Suchiang, Chief Secretary wa kiwi kiwi de. Neiliang u Union Minister ka Road Transport & Highways, u Nitin Gadkari leh da chimbynta lyngba i Video iwa da dep riñ chwa.