Ka Hynniewtrep National Liberation Council (HNLC) da sdang biang ko ki kaam pyntieñ, heiwa ynne ka sngi da thmu wow tympdung IED Bomb hakhmat ka yung krehkaam yong ka seiñ saiñpyrthai, ka National People’s Party, iwa em ha Lower Lachumiere, Shillong.
Katkam wa pyntip ki bru wa yoo ya ini, da ong wa kawi ka muna kawa da thap ya u IED Bomb toh kawa da yoo nadooh dang step hakhmat ka yung krehkaam ka NPP, tangwa neiliang ki pulit da tip ki yei em kani ka muna hadooh i por 3:40 i janmiet.
Hawa ki laad pathai khubor da pyrchang ki wow yaklam wa ki pulit wa kynthup ya u SP ka East Khasi Hills, u Sylvester Nongtnger wa u SP (City), u Vivek Syiem, da kyntait ki wow ong iyi iyi leh, tangwa da pynlait du da i thoh cha ki laad pathai khubor wa da chem ya u IED Bomb wa khia 5 kilo na kawi ka muna hakhmat ka yung krehkam ka NPP.
