Ka seiñ kieñ suloi, ka Hynniewtrep National Liberation Council (HNLC) hadien wa da kam ko wa emkti ko hei wow booh Bomb hakhmat ka yung krehkaam ka National People’s Party (NPP), da maham ko leh ya ki wakreh wa hakhmat dooh yong kani ka Party kawa yahkhmat ya ka sorkar hapoh ka jylla.
Katkam ka wyrta khubor wa da pynlait da ka HNLC da ong wa ka seiñ da yoh yutip ko hajrong i chah siat u Cherish iwa toh i kaam wa da leh da ki kattu katni ngut ki Montri wa em ha ka sorkar wei da maham ko wow tput ya ki khlem wyrai.
Heipor wa kiwa pathai khubor da pyrchang ki wow yaklam wa u Montri Rangbah ka jylla, u Conrad K Sangma da ong u wa ympu yoh u ya kawon kawon ka bui (Report) na ka chnat pulit tangwa da tip u yeini iwa jia lyngba kiwa pathai khubor, da pynrap u leh wa hadien wa yoh ya ka bui daw klam bniah u hajrong ini.
Hawa kylli hajrong i maham ka seiñ, neiliang u Conrad da ong biang u wow yang chwa u ya ka Report.
Neiliang u Lahkmen Rymbui uwa man u Montri ki kaam pohyung ka jylla, da ong u wa i takit hajrong ini da lai i chaphrang wei ympu yoh u ya ka bui na ki pulit.
