U MLA warim ka Nongkrem kamjooh u MDC wa u CEM warim ka KHADC, u Ardent Miller Basaiawmoit ynne ka sngi da sdang u ya ka seiñ saiñhima wa thymme hapoh ka jylla kawa da e pyrtuid kam ka Voice of the People Party (VPP).
Da sdang ya kani ka Party deilang wa ki kattu katni ki bru paidbah kiwa boon wa man kam ki Professor, uwi u Doctor wa kiwi de dei thmu wow yakhun ha ka Election MLA ha u 2023.
U Ardent da ong u wa da sdang ya kani ka Party thymme yow wanrah yei kylla hapoh ka jylla kawa daw pait leh ya ki kaam wa ktah ya ki paidbah. Deiwa ong wa kam uwa chong chnong ym ye u wow chong hi-eh khlem leh iyi iyi.
“Ym ye O wow leh kam uwa thlah wa uwa khlot hawa yoo yei long i man hapoh ka jylla. Kamwa tip phi wa ka jylla daw dap noh ko 50 snem ha u 2022 tangwa ka jylla da hiar ko ha waroh ki liang,” da ong u Ardent.
Da ong u leh wa kam i pyrtuid wa da e iwa mut i sur ki paidbah, i thmu toh wow wanrah yei kylla ha ka jylla neidaw wym em i mon synchaar khadar yow pynyoh yei angnood ki paidbah.
Da kyrpaad u leh ya ki paidbah wow emlang wa ka Party yow wanrah yei kylla hapoh ka jylla, wei da kular u leh wa kawi pa kawi ka Vote wa e ki bru toh neibynta i khooid hei synchaar wa kiwa yahkhmat wa khlan wa i chngaaiñ kamjooh i ya tylli.
Kam wow pynkynmoo wa u Ardent da jooh man u kam u dkhot ka United Democratic Party (UDP) wa ka Hill State Democratic Party (HSPDP).
