Ka yung krehkaam ka chnat Forest & Environment ka sorkar jylla ynne ka sngi da pynkut ko ya ka Wildlife Week ha Iung Duwan ka Raij Langdoh Ionglang hajrong ka phang ‘Forest and Livelihoods: Sustaining People and Planet’ wei da wai leh ya ka Iungduwan ya kawa da chna da ka chnat.
Ha kani ka sngi ya ka yalang da pynlai da u Rikut Parein uwa man u Chairman ka Khloo Blai ka Raij u Langdoh Ionglang Community Reserve Committee hei emlang u SM Sahai, Principal Chief Conservator of Forest (A) kam u kongsan, u HC Chaudhary, Chief Wildlife Warden da man u kam u symbood kongsan hei emlang ka u James M Pohsngap wa kiwi kiwi.
Ka DFO (Wildlife) ka H. Lato kawa e yei kyntien pdiang burom da khana ko kajiak hajrong ka Khloo Blai wa ka Iung Duwan ka Raij u Langdoh Ionglang kawa da chna hapoh ka Integrated Development of Wildlife Habitat heiwa katkam ka Wildlife Protection Act da ebor ko ya ki chnat sorkar wow yada ya ki khloo wa ki thaw wa emkaam wei ya kani ka Khloo Blai da tipmit (Notify) ya ka kam ka Community Reserve Forest ha u 2016 wei ya kani ka Iungduwan da chna ha i lut wa T. 30 lak.
Da ekhublei ko leh ya ka Raij Ionglang wa da pynman ko ya kani ka khloo kam ka Community Reserve kawa heh 15.12 Hectare wei ha West Jaiñtia du heini donhi wa em ki Hullu (Hoolock Gibbon).
Da kyntu ko leh ya kiwi ki chnong, ki Raij wa ki kur wow bood ya ka chnong Ionglang wow pynneh pynsah ya ki khloo chnong, Khloo Blai, Khloo Kur wa ki Khloo Raij.
Neiliang u Dolloi ka Elaka Raliang, u Chawas Lyngdoh hawa klam da ong u wa kamwa 20 snem wa da man u kam u Dolloi tangwa ymjooh tip u wa ye u yoh yarap kamni na ka chnat Forest & Environment deiwa yaroh ya ki waheh ka Raij Ionglang wa da man ki kiwa chemphang wow thooh ya ki laad ki luti wow yoh yarap na kani ka chnat ka sorkar wei ini da pynkhyrngiat i ya kiwi wow bood ya kani ka jooh ka luti.
U HC Chaudhary, da ong u wa ki Hullu man ki ki mrad wa emkaam bha neibhah duna bha u chem ya ki hapoh ka ri India waroh kawi. Da ong u wa ymye wow yada ya ki mrad lada ym em i kitkhlieh na ki bru samen wa ka chnong ka thaw neibhah ymye u dooh yei mantre yong kini ki thaw wa ki khloo.
Chooh chooh da ong u wa hapoh jylla em hadooh 79 tylli ki khloo wa man kam ki Community Reserve deiwa kyntu ya kiwi wow wan chaphrang wow pynman ya ki khloo yong ki kamwa man ka khloo ka Raij Ionglang wa yoh yei yada.
U SM Sahai hawa e yei klam wa tbian ha kani ka sngi da ong u wa ka jylla man ko kawa mahajon bha ha i em ki khloo wa ki mrad wa ha rukom.
Da ong u leh wa toh i kaamram yong uwi pa uwi wow pynneh pynsah ya ka rymaw kamjooh leh ki mrad wa im ha ka.
Kiwi kiwa da klam ha kani ka sngi toh u James M Pohsngap, wei da yoh ya ki kyntien khublei na u S. Law uwa man kam u Range Forest Officer ka chnat.
Ha kani ka sngi da pynphooh pynphieñ ya ka sngi da ki chaad wei da saam leh ya ki khusnaam cha ki khynnah wa da chimbynta ha ki yakob waphær waphær kam ka Drawing, Extempore Speech wa ka Quiz wa da pynman kam chibynta yong kani ka tayaw wa kamjooh leh ya ki bru kiwa da pynlait im ya ki mrad khloo.
