I pteiñ i ku i dor phñiang Petrol/Diesel ha kini ki tayaw ha waroh kawi ka ri iwa ynne ka sngi da poi chei dor wa sy’ad dooh hadooh katni, wei ka jylla Meghalaya leh da man ko kawi na ki jylla wa da chah ktah ha i ku dor i Petrol, heiwa hadooh ynne ka 15 tarik i dor yong i Petrol da tam i ya ka T.100 chi liter ha ka jylla.
Neiliang ka Working President yong ka Meghalaya Pradesh Congress Committee, ka Dr. Mazel Ampareen Lyngdoh, da kylli ko yei ku syndet i dor Petrol wa Diesel, heiwa da ong ko wa man iyi iyi wa sñiawsih wa ka sorkar da pynku dor ko yei Petrol wa Diesel da iwa cha palat i wym jooh chem mynnu mynnu ha kani ka jylla.
Ka Dr. Ampareen kawa man leh ka MLA na East Shillong, da kyllli ko yei daw wa da pynku ya i dan i umphñiang kari, heiwa da ong ko wa heipor wa chah ktah ha ka khlam, ka sorkar da pyntip wa da kynthup leh ya ka dan Covid (Covid Tax) ha ki mar ki mata, tangwa iyi won wa pynman ya ka dan wa katni.
Da ong ko wa ini i ku dor i phñiang kari daw ktah chiboon ya ki marbam yong ki bru paidbah. Da ong wa hachwa ini i ku dor, ka sorkar India da pynsñiaw ko wa i ku dor toh ha waroh kawi ka pyrthai, tangwa iwa lyngngoh wa ha itu i por i ku dor cha kiwi ki ri ka pyrthai ym toh i daw wa da e.
Chooh chooh da ong ko wa da dep wow kylli tangwa neiliang ka sorkar ym jubab ko, deiwa kylli iyi wow jia ya ki bru paidbah, cheiwon itæ i e kum Gas mynkna, hawa i dor katni da ku cha ka T.1000 kawi, iyi wow jia, wei kini kiyi kiyi toh ka sorkar wow jubab.
Da ong ko da man iyi iyi wa sñiaw sarom wa iwa phylla toh wa ka sorkar da leh khlot leh thlah ko hajrong ini, iwa ktah ya waroh chi kattu kiwa da lai hei eh neidaw i wan yong ka khlam.
