Lada dang boohteiñ lane dang artatien phi wow lai cha ka kchaaid Rynji na kiwa boon ki daw boi wa mut phi wa jngai ware, boi wa sih sarok, boi wa hap u lai kjat jngai- kini da man ki du ki daw donhi wei ye u man wa nachwa heipor wa lai nyngkong phi da hap wow ku wow hiar boon ki riat iwa da pynman ya phi wow ong “Ini donhi chisien ym bien de”. Katni waroh ini da kylla wei da man ko kawi na ki kchaaid wa suk bha u poi wei da man ko leh kawa da wai paidbah biang nadooh ka 25 tarik u Naikhynde hadien wa da chah biang ka sorkar wow wai ki thaw uiñke suwari.
Na waroh ki kchaaid wa da lai i, kani man ko leh kawi kawa khooid bha ki soodong sookun yong ka.
Neiliang u Wyrta u jubab i ya iwa kwah phi u tip chwa wow lai lada dang boohteiñ phi u lai.
Katwon jngai kani kani ka kchaaid?
Lada toh phi kiwa sah ha Jowai, jngai ko du 38 Km donhi hadooh wa poi phi ha ka thaw pynyieñ kari yow hiar dei kjat cha kani ka kchaaid wei deiwa yah kari khlem da pynhær leh du chi kynta chiphaw minit da poi.
Kammon man u sarok?
U sarok nadooh na Pynthorsale hadooh wa poi cha ka kchaaid toh uwa da siang psiang katwa nadooh Kongong hanla man u dei psiang leh em hi kattu katni ki bynta wa sih iwa ym toh hadooh wow ong phi, “Pi dong biang cha yung”.
Lait hi u lai da ka kari hadooh wa poi cha ka kchaaid?
Ym lait, tangwa nadooh na i thaw pynyieñ kari hap hiar da ki rana wa da chna bha dei miat heiwa da em leh iwi i thaw wa da chnang kyrpang yow pait ya ka khchaaid namo ka View Point kawa man leh kam kawi na ki thaw wow chondor ya ka “Instagram” yong phi. Da chna leh ya ki rana wow hiar hadooh cha tre kchaaid wei lada ymtoh man phi kiwa khlan bor leh dang ye hi u poi thaw wei manda liwan boi daw hap u chong ngiah chisien tangwa ya kiwi hi te man ko kawa suk wow hiar wei wow ku.
Khooid hi i thaw?
Heipor wa lai i ymem yoo i iyi iyi leh i jhep lane ki kynja Plastic cheiwon cheiwon leh wei ki bru wa wan leh kopsar kiwa da sñiawthooh ya ini wei ym em kiwa pyntaroi iwa man leh iwi na ki dak wa kam kiwa laike wa daw sahkynmoo phi yei wym em yoo Plastic cheiwon cheiwon.
Hoi hi u yimpa ha kani ka kchaaid?
Ym pynchlur i wow yimpa neidaw ka um ha tre ka kchaaid toh kawa yillu wei charood ka kchaaid leh toh kawa khlanbor kawa kai.
Dang em hi kiwi ki thaw wow laike wa em cha jan?
Chwa wow poi cha ka laad wow hiar cha Rynji, em leh i thaw wa ka-it bha ki bru katni wow booh cha ka Instagram yong ki, itæ toh i Sah Ksaw iwa da dep pynlut chiboon wow chna nadooh ka yingkieñ doi-doi wa kiwi ki thaw chongke wa da chna kyrpang. Kani ka thaw leh da man ko kam ka thaw baam-doh wei hadien wa wan na Rynji ye phi wow chong baam ha ini i thaw.
Em dukan ja hi ha kini ki thaw?
Ha ka sngi wa lai i lait na ki dukan khian wa dai um, dai umsoh wa ki Chips wa chana, ym em chem ya ki dukan ja, kamtæ bha wow song chwa na yung.
Em paikhana hi?
Ha ka kchaaid Rynji ym em paikhana tangwa ha Sah Ksaw em hi.
Dang em hi kiwi ki kchaaid chajan?
Chwa wow poi cha Sah Ksaw wa cha Rynji em ka kchaaid Moopun kawa man leh sa kawi wa pawnaam kawa ye u chem pyn ha kani ka jooh ka sarok.
Kini ki kchaaid wa ki thaw wa em cheini dang man ki kam chibynta ka wah Myntdu iwa mut kiwa em um waroh chi snem.
Katwon ka bai psiah cha kini ki thaw?
Ha kchaaid Rynji kamjooh ha Sah Ksaw hap wow su T. 30 samen ha waroh ar thaw wei da pait ya kini ki thaw da ka Dorbar Chnong Cham Cham. Heiwa ya ka Sah Ksaw da tip leh ya ka kam ka Fish Sanctuary.
Kini ki thaw uiñke suwari wa em ha kani ka thaaiñ toh kiwa pait da ka chnong ka thaw wei da man ki leh kam ka nongmuna ya kiwi ki chnong kiwa kwah wow yoh myntoi na ki thaw wa miat wa em chajan yong ki wow sdang ki wow pynchna pynmiat. Heiwa ha kini ki thaw da yoh yarap na ki kreh 100 sngi wa na ka District Mineral Fund.
U sarok lai cha Rynji 
U sarok lai cha Rynji 
Ki rana wa hiar cha Rynji 
Ka View Point ha Rynji 
Ki rana wa hiar cha tre ka kchaaid Rynji 
Ka kchaaid Rynji 
Ha Sah Ksaw 
Ha Sah Ksaw 
Ha Sah Ksaw 
Ha Sah Ksaw 
Ha Sah Ksaw 
Ha Sah Ksaw 
Ha Sah Ksaw 
Ha Sah Ksaw 
Ha Rynji 
Ha Sah Ksaw
