Ka seiñ JSU ynne ka sngi ha ka yalang wa da man yong ka Executive Committee da rai ko wow e i kyrchaan ya i dawa ka Jaiñtia Hills Truck Owner Association (JHTOA) hadien wa ka seiñ da pynsñiaw ko cha ka JSU ya i eh i khoo wa chem ko (JHTOA) hajrong i lehbor ki karkhana pynmih khyndawbilat wow yoohbeiñ ya i khayi pateiñ ki tre jylla.
Ka seiñ da pynsñiaw ko wa ini i e kyrchaan ya ka JHTOA toh neidaw wa hapoh kani ka seiñ da em ki tre jylla (khamtam na Ri-loom Jaiñtia) kiwa da chah lehbor ha ki karkhana ya ki tre truck iwa da ktah joor ya i khayi pateiñ neibhah wa ki karkhana da sdang ki wow thied truck da ki yong ki hi wow kit ya ki mar kam i khyndaw-bilat cha kylleiñ ki thaw.
Ka JSU da ong ko leh wa ini i leh ki karkhana da booh ha i eh i khoo ya ki tre ri neibhah wa da dooh kreh ki wei da hap kset donhi wei em boon ki ram wa hap su ki cha ki Bank wei da em wot kiwa da chah taan noh ha ki Bank neidaw wymye ki wow su ya ka ram.
Kamtæ ka seiñ da chim noh ko ya i rai wow yieñ skem hajrong ka yurom yong ka wow yarap wei wow kyrchaan ya ka JHTOA wow pyndooh chisien donhi ya i lehbor ki karkhana wei ka seiñ da phah ko ya ka Wyrta cha ki karkhana wa toh u burom ki ya ki tre ri tre jylla ymtoh wow thombor yei kamai yong ki.
