Kam chibynta yong i lehkmen dap 50 snem ka jylla, ka yung krehkaam u Executive Engineer, Water Resource Department, East Jaiñtia Hills District, Khliehriat ynne da pynman ko ya ka yalang pynsñiawthooh ya ki Water Users Association (WUA) ka District ha yung krehkaam District Agriculture Officer, Khliehriat.
Ha kani ka sngi u DC ka District, u E. Kharmalki, da khana u ya i myntoi wei wow pynemkaam hok ya ki Scheme sorkar ha ki chnat sorkar deiwa ong wa emkaam wa ki paidbah u bood ki ya i rukom im wow yada ya ka rymaw wa kiwon kiwon kiwa em ha ka.
U R. Lyngskor, Executive Engineer, Water Resource Department da e u ya ki kyntien pdiang burom heiwa da khana u wa ya kani ka yalang da pynman kam wow pynsñiawthooh paidbah ya ki kaam, ki kreh wa ki Scheme wa da pynkrehkaam da ka chnat deiwa kyntu ya ki warep wa ki seiñ wow kreh wa ka chnat khnang wa kiwon kiwon ki kreh wa ki thong u man ki kiwa jop.
Kiwi kiwa da klam ha kani ka sngi toh u D.B. Dhar, Assistant Director Agriculture (Agro), u A. Malang, Horticulture Development Officer, u R. Tongper, J.E. Water Resource Department.
Ha kani ka sngi da pynkup burom wei da e leh ya ka song poisa cha ka TISHA Water Users Association na chnong Shnongrim wa man ko kawa da paw bha ha ki kaam ka chnat hapoh ka District.
