Ynne ka sngi kawa tip kam ka Police Commemoration Day, ki pulit ka West Jaiñtia Hills da kynmoo warom ki ya ki 377 ngut ki pulit ka ri kiwa da khlaad hapyrdi wa dang pyndep ki yei kaamram (On Duty) yong ki ha ka chi snem wa da lai.
Ya kani ka lehwarom da pynman ha Police Reserve Administrative Building, Jowai hei emlang u SP ka District, u Bikram D Marak, u Addl. SP u Bijay Chetrri, ki DSP wa kiwi ki sahep pulit.
Hawa e yei klam ha kani ka sngi, u Bikram D Marak da pyntip u wa ya kani ka sngi da sdang u leh warom hadien wa 10 ngut ki pulit ka ri namo ki Central Armed Police Force (CAPF) da khlaad ki hadien wa wan kyntoor pood ka China chapoh India ha ka 21 Naichiphaw 1959 ha Ladakh.
Da ong u wa hadien kamwa chi bnai ki chpai ka China da ekti ki ya ki metyap yong kini ki 10 ngut ha utai u snem wei da thang emburom ya ki ha Ladakh.
Ynne kam chibynta yong kani ka sngi da lehwarom leh ya ki 377 ngut ki pulit ka ri kiwa kynthup ya kiwa na ki chnat ka CAPF kiwa kynthup ya ki BSF, CRPF wa kiwi kiwi wei da kynmoo warom leh ya u Klidwet Suchiang, Constable (Driver) ka MLP.
Ha kani ka sngi da booh leh ya ki syntu kam ka dak wow kynmoo warom ya ki wei da puræ leh ya i pyrtuid yong waroh ki 377 ngut.
