Ha ka 19 tarik uni u bnai ka Society For Urban & Rural Empowerment (SURE), Jowai da pynkut ko ya i e sikai soor namo syntu ha ki that kawa tip kam ka Embroidery Training ha Community Facility Centre Mukhap ha ka chnong Mukhap, West Jaiñtia Hills District, Laskein Block.
Ya kani ka Embroidery Training da sdang nadooh ka 6 tarik uni u bnai heiwa da em hadooh 21 ngut kiwa wan chah sikai.
Ka thong yong kani ka e sikai toh wow e yei sikai wei wow pynku yei sap wa em ki yow pynheh yei yoh i kot khamtam ya ki kynthai wa ki khynnah khynroo khyllood.
Ka Sharki Suchiang kawi na kiwa chah sikai wei man ko leh kam kawa thaiñ that hapoh ka Mukhap Handloom & Handicrafts da pynsñiaw ko yei sñiawngooh wa da yoh ya ini i chah sikai wei da angnood ko wow yoh yei sikai chaphang i leh Embroidery.
Neiliang yong ka Dalangki Suchiang, Master Trainer da ong ko wa smat ko wow e yarap ya kitu kiwa chah sikai lada emkaam ki wei da kyrmen leh wa lyngba kani ka e sikai daw e myntoi chiboon ya kiwa chah sikai kamjooh.
