Ynne ka sngi wa soo ka lympung yalehke Basketball neibynta kiwa 30 snem chaneiñ i rta ha Shillong kawa tip kam ka 1st Veteran Basketball Tournament wa pynman da ka East Khasi Hills District Basketball Association, da pyndep ya ki yalehke wa da dang sah chwa wow sdang ya ki yalehke Semifinal.
Ki yalehke wa pynman toh artylli heiwa nyngkong ka 99 Problems waka Eastern Range da yakhun ki wow yakhun yei thaw yong ki ha ka Semifinal. Heiwa ka Eastern Range da tam ko nadooh wa sdang yow yoh yei jop.
Kiwa jop ha ki yalehke ki chynrang:
Ka Eastern Range (Wanrapborlang Laitmon 9 pts) da jop ko ya ka 99 Problems (Gavin Deingdoh 14 pts) da 44-30, ka Lumshyiap United (Emerald 16 pts) da jop ko ya ka Mawphlang (D. Kurbah 8 pts).
Ki yalehke Semifinal ha ka 22 tari uni u bnai man ki kamni ha wah.
Ka Semifinal wa nyngkong ki kynthai toh hapyrdi ka SYM pyrchah ya ka Lawsohtun Marvel, katwa ka wa ar won toh hapyrdi ka Splash pyrchah ya ka Promising SC.
Ha ki chynrang won, ki yalehke Semifinal toh hapyrdi ka Iaineh SC pyrchah ya ka Nongstoin Ballers, iwa pynbood da ka Madanriting pyrchah ya ka Eastern Range. Ki yalehke toh ki wow sdang heipor 1:30 i sngi ha St. Anthony’s Hr. Sec. School.
