Ka Northeast Slow Food and Agrodiversity Society (NESFAS) da beiñ joor ko ya u MP na Shillong, u Vincent H Pala uwa da ong wa wa daw rah u ya i rukom rep thang khloo (Jhum Cultivation) ha ka yalang yong ka 26th United Nations Climate Change Conference (COP26) kawa daw man ha Glasgow ha uni u bnai wow wan.
U Executive Director ka NESFAS, u Pius Ranee da ong u wa u MP toh u syllok wei emkaam wow tip bniah chwa wow klam neibhah ini i rukom rep thang khloo neibhah ymtoh i wow pynjæd ya ki khloo deiwa ong wa kawi na ki laad wow yada ya ka rymaw toh lyngba i rukom rep.
Da ong u wa katkam i chem ka NESFAS, em chiboon ki rukom rep tynre toh lyngba ri rep thang khloo, wei lada pyndam ya ini i rukom rep daw wiar i rukom im ki bru ha ki chnong ki thaw, wei daw wiar lut waroh ki symbe.
Katkam wa ong u Ranee, em kamwa 200 tylli ki jait baam kiwa da ye wow pynmih na ini i rukom rep, wei katkam i rukom puræ bniah ha ki 18 tylli ki chnong ha i por wa wan ka khlam COVID-19, i yap thngan toh du kamwa 11% ha kini ki chnong, katwa ha Asia waroh kawi da man i hadooh 40%, iwa pynyoo wa lada pynneh pynsah ya i rukom rep tynre dang dap i baam nei rukom rep tynre.
