Ynne ka sngi u President ka All Jaiñtia Cement & Clinker Transporter’s Association (AJCCTA), u Balen Thubru, da pynche u hajrong i kam u Kyrshan Dkhar wa da beh seiñ wei ini toh iwa bakla neibhah u Kyrshan toh uwa kreh kam u Secretary ka seiñ wei da thung ya oo wow thoh kot donhi u wei yeiwa kreh u da su ya oo da ka tulop wei da rai wow beh kreh ya oo ha ka 2 tarik uni u bnai heiwa da thung noh ya u Bonefast Rymbai kam u General Secretary wa thymme ka seiñ.
Chooh chooh da maham leh ya u Kyrshan wa ymtoh u kam u wa oo dang em u hapoh ka seiñ wei lada chem wa leh u kamni daw pynchitom noh hi ya oo wei katkam wa man katni ka seiñ em ko du ki Transporter kam ki dkhot ha ka seiñ.
Hajrong i pynbaad u Kyrshan wa u Balen yachah u ya ki dkhar, neiliang yong oo da pynche u wa ka seiñ kreh salonsar ko khlem pait ya i man jautbru wei da pynchlur ya ki Pnar wow wan ki chaphrang ha kani ka kaam kawa man kawa yoh myntoi bha.
Heijooh i por da kyntu u ya ki seiñbhalang wa ymtoh u ngait ki ya iwa kam u Kyrshan neibhah wa ya oo ymye u wow pdiang næ kynthup ya ki seiñ kam ki transporter wei oo (Kyrshan) ymye u wow kam wa toh man u kam u President ka AJCCTA.
Heijooh i por da phah leh ya u Kyrshan wow pynuiñ u ya ki kot kari ka Ambulance ka seiñ lym kamtæ ka seiñ daw hap leh ko deiwa emkaam hajrong ini.
Neiliang u Moonlight Mulieh, Treasurer ka AJCCTA da ong u wa hapoh ka seiñ kiwa ye u ksoh kaam wa kiwa ye u man dkhot toh du kiwa em truck næ man Transporter katwa u Kyrshan ym em u wot kawi wot leh ka truck.
