Hadien wym em wa wan kam ya i metyap yong kawi ka bru kawa tip kam ka Aiti Mary Suchiang ynnin ka sngi ki pulit ka East Jaiñtia da pyndep noh ki ya ka niam thang ya i metyap yong ka.
Kam wow pynkynmoo heini kani ka bru ya kawa da tip leh kam ka Lakshmi da lai chimkti ki pulit ya i metyap yong ka na i yung wa sah ko ha Dhiar, Umlawang, Elaka Sutnga, East Jaiñtia Hills ha ka 18 tarik uni u bnai.
Neiliang ki pulit da kem ki leh ya u kurim ka Lakshmi ya uwa da tip kam u Sunil Limbu uwa 32 snem i rta.
Da ong wa da em i awri hapyrdi yong kini ki chi kurim ha ka 16 tarik wei hei metyap yong ka da em ki dak takha mynsoo wei da em leh ki dak ha rdang wa ye u man wa da chah ksih ko.
Hajrong ini neiliang ki pulit dang yang ki ya ka Postmortem Report wei u Sunil dang chah kset u wei dang pynman chooh ya ka takit hajrong ini i jia.
