Ka BJP Mahila Morcha namo ka seiñ manbei ka BJP da ujor ki cha ka Superintendent ka MCH Hospital, Tura yow dawa takit yei chah pynbaad wa ki Doctor da phah ki ya kiwa wan phah sumaar yow lai cha ki thaw sumaar (Clinic) ki bru samen yow leh ya ka Sonography deiwa hap pynlut hi ya ka poisa kiwa phah sumaar hanla ka Hospital em hi ko ka yong ka hi ka kor kawa krehkaam.
Kani ka thaw sumaar ya ki manbei, kiwa punkhon wa ya ki khynnah da chah pynbaad ko ha ka Women’s Wing ka BJP heiwa da ong wa ini i rukom leh toh iwa man pyrchah ya ka aiñ yow phah lai cha kiwi ki thaw yow leh Ultrasound.
Ha ka ujor da ong wa ini i rukom leh ym du wa man i pyrchah ya ka aiñ, da ktah ko leh ya kiwa dooh wa duk kiwa da chah pynchitom heithaw wow yoh myntoi ki na kani ka thaw sumaar sorkar.
Ki manbei ka BJP da pynbaad ki leh wa ki Doctor deilang wa ki Nurse toh ki wym yoosuk i akor ki wym tip u pyrkhat ya kiwa wan phah sumaar najrong wa pynyang slem ya ki.
Ka Mahila Morcha da ong ki wa da wan ki chakhmat neidaw wa da yoh ki boon ki ujor na ki paidbah heiwa ka thaw sumaar sorkar kawa toh u yoh myntoi ki paidbah, da chah mai chah tim pathan ki hawa wan phah sumaar khamtam kitu kiwa wan na palatsor ki wym sñiawthooh ya iwa toh u leh ki hawa phah sumaar.
Chooh chooh da pynbaad wa ki Doctor toh kiwa boonkaam du wow khana tang wot heipor wa kreh ki. Wei kiwa wan phah sumaar da hap ki wow yang hadooh wa dep ki Doctor wow khana tang deiwa kylli kiyi wow bahkhlieh lada em iyi iyi wa jia ya kiwa wan phah sumaar.
