Ka seiñ Jaiñtia Students’ Movement (JSM) Eastern Region wa Southern Region ryngkat i synraan lang kiwa yahkhmat ka seiñbei, ynne ka sngi da lai ki wow tuklar ya kawi ka karkhana pynmih khyndaw-bilat kawa tip kam ka JUD Cement wa em ha Wahiajer, East Jaiñtia Hills.
Ya ini da leh hadien wa ka seiñ da yoh ko ya kiwa boon ki ujor na ki bru ka thaaiñ kiwa kreh mylla ha katai ka karkhana hajrong i boon i eh wa da yachem ki, nadooh i wym su tikna yei nong sngi iwa da sahtieñ hadooh 3 bnai.
Ym biang leh i thaw sah, ka umbaam umdih wa i chah yooh beiñ wa i leh chiliang ya ki tre chnong ha ki bor pynlai yong katai ka karkhana.
Ka seiñ hawa yaklam wa ki bor pynlai yong ka karkhana da e por hapoh chi bnai wow su ya ki tulop yong ki wakreh yong ka wei wow pynboon da ki bru tre jylla hawa boon ki khynroo dooh kreh ki wei lada ym leh yeini ym yohsa de wow lai khang chisyndon ya katai ka karkhana.
Ka seiñ da maham ko leh wa toh u pynbiang ya ki kot ki sla yong ki wakreh kiwa wan na baar jylla kam ka Labor License wa Trading License.