Hajrong ka yurim wow yoh ya i esikai katkam ka juk wa i stat wa katni neibynta ki wakreh Veterinary Assistant, neiliang ka Meghalaya Animal Husbandry and Veterinary Subordinate Technical Staff Association (MAHVSTSA), Shillong ynne ka sngi da pynman ko ya ka Scientific Seminar wa ar sngi ha Vocational Training Centre Khliehtyrchi, West Jaiñtia Hills.
Ya kani ka Seminar da kyrchaan poisa da ka chnat Directorate of Animal Husbandry & Veterinary ka sorkar jylla hapoh ka National Livestock Mission (NLM).
Hawa e ya ki kyntien pdiang burom, u F. Majaw, President MAHVSTSA da ong u wa ymtoh wow kreh du wow yoh tulop, tangwa emkaam wow pyrkhat nyngkong hajrong kammon wow pynku ya ka mynried ki warep neibhah wa toh ka chnat kawa ki bru ye ki wow kyruiñ hawa emkaam ki.
U Dr. KB Sahkhar, Director, A.H.& Veterinary Department hawa e yei klam ha kani ka sngi da pynsñiaw u leh ya ka Artificial Insemination Programme deiwa ong wa ini ymtoh du i thong wa hakhmat yong ka sorkar pyrdi tangwa man ko leh ka bynta wa ye wow yarap pynku ya i yoh i laa ha ka jylla.
Da pyntip u wa ha kani ka kynti da wanrah ki boon ki symbe yong ki jait mrad wa na baar kam na Germany wei dang ini wadep da wanrah ki na Andhra Pradesh, wei katni emkaam wow lai chaphrang neibynta wow pynbiang yeiwa kreh kiwa psan mrad wei da ong u wa ka chnat da leh ko ya kiwa boon ki kaam wow jop ya i eh i khoo wa da maad ha ki por wa da lai dei kyrmen skem wa daw yoh yei krehlang neini chaphrang.
Heijooh i por da ong u wa i kaam psan mrad toh iwa yoh myntoi bha chiboon kamtæ da kyntu u ya kiwa seiñ kreh na Ri-loom Jaiñtia wow chimkhia ki ya i kaam psan mrad khnang wow yoo yei kylla wei wa ka sorkar pyrdi leh da pynkreh ko ki laad wow yarap heiyatoh wa ki kaam psan mrad.
Ya kiwa chimbynta ha kani ka Seminar, u Dr. Sahkhar da kyntu u ya ki wow chimkhia ya i kreh wei emkaam wow sñiaw ki wa ki bru waroh kyruiñ ki cha ki.
Chooh chooh da ong u wa hawa chah khut ha iwon iwon i por wow chimbynta ha ki esikai namo ki Seminar ymtoh wow kyntait ya ki neibhah wa hanla ympu ye wow ksoh lut yeiwa da hikai ye won wow ksoh ya ki kattu katni ki yutip wei wow chimbynta ha i phyllu yumut wa ki bru chemphang kamjooh leh para wa psan mrad.
Kiwi kiwa da klam ha kani ka sngi toh u Dr. D.I. Kjam uwa man kam u District A.H.& Veterinary Officer, WJH, u K. Dkhar u President ka MAHVSTSA Jaiñtia Hills Unit wei ya ka yalang ynne ka sngi da pynlai da ka Dr. (Mrs) D. Papang, District Training Officer VTC Khliehtyrchi.
