Hakhmat kiwa boon ki paidbah wa kyrchaan yong ka NPP kiwa da wan wow ap yei pynche wa khaddooh na kiwa yahkhmat yong ka seiñ ha ki ar tylli ki yalang paidbah kiwa da pynman ha Tyrsad wei leh ha Mawphlang neibynta ka Election chiteiñ samoi na ka Mawphlang Constituency da pynkut noh ynne i janmiet ha Mawphlang.
Kawa rap kongsan ha kani ka yalang paidbah kawa khaddooh ha Mawphlang toh deiwa khut u kyrtong ka NPP u Lamphrang Blah wow suki kiaw 2 minit kam i dak wow kynmoo warom ya u MLA warim uwa da khlaad noh na kani ka pyrthai, u SK Sunn.
Kam wow kdaw heini wa ka NPP da pynyieñ ko da u Lamphrang Blah kam u kyrtong wow e reiñ ha kani ka Election chiteiñ samoi na Mawphlang hadien wa khlaad noh u MLA ka thaaiñ, u SK Sunn.
Kiwa boon kiwa yahkhmat ka NPP kynthup ki nadooh u National Vice President uwa man leh u Symbood Montri Rangbah, u Prestone Tynsong, u Ngaitlang Dhar wa kiwi kiwi hawa klam ha katai ka sngi da pynche ki ya ka yurim krehkaam wa ka NPP em ko.
Ya ki yalang yalap Election neibynta u Lamphrang Blah ha katai ka sngi da synraan lang nadooh u MLA ka Mawshynrut, u Gigur Myrthong, u MLA ka Nongstoin u Macmillan Byrsat, u MDC ka Laban-Mawprem u Mitchel Wankhar, u President ka NPP East Khasi Hills, u Jied Kurbah, u Jansing Tynsong MDC warim wa kiwi kiwi.
