I thap Vote neibynta ka Election chiteiñ samoi ha 24 Mawphlang Constituency da man ko kawa lai bait nadooh i por step ynne ka 30 tarik wei ha kani ka sngi da sakhi yei mih ki paidbah wow jied ya uwa mihkhmat wa thymme kam u MLA yong kani ka Constituency.
I pynman ya ka Election chiteiñ samoi ha Mawphlang toh hadien i khlaad noh u MLA, u Syntar Klas Sunn ha u bnai wa da dep, katwa ya ka Election ha Rajabala da hap wow pynman nei khlaad noh u MLA, u Dr. Azad Zaman. Ka Mawphlang Constituency em ko 33194 ngut kiwa thap Vote ha ki 50 tylli ki Polling Station, katwa ka Rajabala da em 32750 ngut kiwa thap Vote ha ki 58 tylli ki Polling Station.
Neiliang yong ka chnat Election da pynbiang ko ya ki bor pulit khamtam ha Rajabala kawa da mih i kynaad hapyrdi kiwa kyrchaan ka NPP wa ka Congress ha ka sngi wa kut i yalap Election, wei neiliang ka chnat da pyntikna leh wow pynkrehkaam ya ki kyndon wow yada na ka u khñiang COVID-19, wei da pynemkaam leh ya kiwi ki laad neibynta wow lai bait i thap Vote ha kani ka sngi.
Ha kani ka Election chiteiñ samoi, ha Mawphlang da em le ngut ki kyrtong na ki seiñ wa paaw ha ka jylla, kitæ u Eugeneson Lyngdong na ka UDP, u Kennedy C Khyriem na ka Congress wa u Lamphrang Blah na ka NPP. Ha Rajabala kiwa yakhun ya kani ka Election da em ki hadooh 5 ngut wa kynthup ya ka Hashina Yasmin Mondal na ka Congress, u Abdus Saleh na ka NPP, u Ashahel D Shira na ka UDP, u Kingstone B Marak na ka BJP wa uwi u kyrtong samen.
Kam wow pynkynmoo wa ha ka MLA Election kawa da man ha u snem 2018, u SK Sunn uwa man u kyrtong samen, da chah jied u kam u MLA ka Mawphlang deiwa yoh 11162 Vote pyrchah ya u Kennedy Khyriem yong ka seiñ Congress uwa da yoh 10444 Vote. Ha ka Election 2018 ha Rajabala u Dr. Azad Zaman yong ka Congress da chah jied u kam u MLA deiwa yoh 7420 Vote wei da pynrem u ya uwa wan wa ar uwa man u kyrtong samen, u Ashahel D Shira uwa da yoh 6482 Vote.
