Ka KSU da thoh ko cha u Montri ka sorkar pyrdi wa pait ya ka chnat Environment, Forest & Climate Change, u Bhupender Yadav yow pynsñiaw yei pyrchah yei tyrwa wow pynkylla ya ka aiñ Forest Conservation Act (FCA), 1980.
Ka seiñ da ong ko wa i thmu wow pynkylla ya kiwon ki thaw wow kheiñ kam kiwa man khloo wa kiwon ki wym man khloo yow chah wow leh ya ki kaam wym yahaap wow leh hapoh ki thaw wa man khloo daw tynyap ko leh ya ka hukum ka Supreme Court wa pynmih ha ka 12-12-96 wei ini daw wanrah ko yei dooh noh ya ki khloo yow sdang ya ki kaam wa boon jait ha ki thaw wa man khloo.
Ini daw wanrah ko leh ya ki laad ya ki bru wow chim kabu heiwa ym emkaam de wow yohbor namo ka Forest Clearance wei ini daw ktah bha ko khamtam ya ka thaaiñ Northeast wa ki khloo wa em hapoh ka Sixth Schedule.
Da ong leh wa ini i pykylla ya kani ka aiñ yoo lakam wa ym toh de wow pynneh pynsah ya i khloo wei da man kamwa ekti suk wei deiwa toh dor yow chah pyndooh ki khloo wei i chah wei pynlait na ki kyndon aiñ lada leh da ki Extended Reach Drilling (ERD) yow tih ya mar pohkhyndaw deiwa siam (Drill) na chrooh ki loom toh kawa daw ktah bha ya ka rymaw neibhah ym em sabut wow pynyoo wa ini ym ktah i ya ka rymaw.
Kamtæ hajrong kini waroh da pyrchah ya kini kiwa da tyrwa wow pynkylla (Amendments) ya ka aiñ Forest Conservation Act 1980 wei da paan pynche chooh chooh hajrong ki phang wa da kdaw haneiñ neibynta ka jylla Meghalaya waka thaaiñ Northeast waroh kawi.
