U Montri Rangbah ka jylla, u Conrad K Sangma ynne ka sngi da ong u wa ka sorkar da phiah ko ya i kyrriah ya ki bru na Them Metor næ Sweeper’s Colony ha ki le bynta, heiwa ha ka bynta wa nyngkong toh hajrong i mantre ya i thaw wa da chimkti ka sorkar, kawa ar toh wow kyrriah ya ka yung krehkaam ka Shillong Municipal Board wei kawa le won wow kyrriah ya ki wakreh ha ki chnat sorkar cha kiwi ki thaw wa da pynkhreh wei wow phah ya kiwi tawon wow kyrriah ki katkam ka aiñ.
Hajrong i kyrriah ya ki wakreh ha ki chnat sorkar, da ong u wa hadooh katni kamwa 40 tylli ki manyung da mih ki na ini i thaw wei kattu sah wow kyrriah ya kiwi tawon wei ini daw leh ha ki kajiak sngi wow wan.
Heiyatoh wa i pynmih khubor ka Harijan Panchayat Committee wow yakhun pyrchah ya ini i thmu ka sorkar, u Conrad da ong u wa ka sorkar daw leh ko katkam ka aiñ wei ym em iwa cha baar yong ka aiñ. Chooh chooh da ong u wa i klam ka HPC wa kiwa pathai khubor toh wa sñiaw ki lakam wa chah beh yabor tangwa ka sorkar smat ko wow yaklam pynbait wa ki wow thooh ya ki laad wow pynhunlang.
U Conrad da ong u leh wa ha kani ka kynti i kreh ka sorkar ymtoh iwa suk neibhah wa ini man i i kaam wa da sah da slem tangwa daw lai ko chaphrang wei daw yaklam ko neibynta i bha waroh lang.
Chooh chooh da pynskem u wa ya i thaw ka sorkar dadep kamtre wei da chimkti katkam ka Tripartite Agreement wa da soi hapyrdi ka chnat Urban Affairs, Shillong Municipal Board wa u Syiem ka Hima Mylliem.
