U Montri Rangbah ka jylla uwa man leh u National President ka NPP, u Conrad Sangma ynne ka sngi hawa yaklam wa kiwa pathai khubor da ong u wa heiyatoh wa ka Rajabala wa nadooh i por ka NCP ym jooh jop ki ha kani ka Constituency heiwa ha u 2013 da yoh ki 450 vote, ha u 2018 da yoh ki 4,800 wei ha kani ka kynti da tam 11,000 Vote wei ini ymtoh iwa khian wei ya ini da ong u hadien wa jop u kyrtong ka Party na Rajabala, u Md. Abdus Saleh uwa da yoh hadooh 11,823 Vote,
U Conrad da ong u leh wa ini pynyoo i wa ki paidbah da kyrchaan ki ya ki kyrtong yong ki Party ha ka sorkar MDA heiwa waroh ki le tylli ki Constituency da jop ki neidaw ki kaam pynroi wa da leh ka sorkar MDA.
Da ong u wa ki paidbah da sñiawthooh da chynna ki ya ki kaam wa da leh ka sorkar wa yahkhmat ka NPP neibhah wa da yoo ki yei kylla wei itæ donhi wa pynman ya ki paidbah wow kyrchaan ya ki kyrtong ki Party wa em ha kani ka sorkar.
Hawa kylli na u Md. Abdus Saleh ya ki kaam wa daw leh u hapoh kini ki chisnem tam, da ong u wa daw kreh u neibynta ki paidbah yong ka Constituency wei wow wan kylli biang hadien chisnem tam.
