Ka sorkar Meghalaya lyngba ka Meghalaya Power Distribution Corporation Limited (MePDCL) da chim ko ya ka rai wow pyndam noh ya ka soskular (MoU) wa da soi waka Byrnihat Industries Association (BIA) yow kheiñ bai bordiñ da iwa kyrpang ya ki.
Kani ka MoU toh kawa da ya soi ha ka 07-10-20 tangwa neiliang ka BIA ym ye ko wow bood ya i kyndon wow pynemkaam bordiñ katkam ka Average Load Factor (ALF) wa booh kawa man 68% da waroh ki 7 tylli ki karkhana wa em hapoh ka BIA iwa da wanrah yei dooh nong ya ka MePDCL.
Kamtæ neiliang ka MePDCL da pynkrehkaam ko da ka kyndon Clause 17 ka MoU yow pyndam noh ya kani ka soskular.
Ini da mut wa ki karkhana wa em hapoh ka BIA daw hap ki wow su ya ka bai bordiñ katkam ki dor wa da booh da ka Meghalaya State Electricity Regulatory Commission ha ka hukum wa da pynmih ha ka 01-04-21.
I wym ye kini ki karkhana wow pynemkaam bordiñ kamwa da booh da pynbor ko ya ka MePDCL wow dai toh dor yei bordiñ cha baar jylla hadien wa da booh bordiñ kyrpang ya kini ki karkhana.
Ini leh ym yahaap de wa i bordiñ wa da pynmih waka bai bordiñ wa ye ka MePDCL u pynlang iwa da wanrah kylla yei sah ram wei chah pynduna bordiñ wa e cha ka jylla da ki thaw pynmih bordiñ.
