Ka Jaiñtia Students Movement (Western Region) ynne ka sngi hadien ka yalang ka Executive Committee (EC) da iwi i sur da kyrchaan pura yaka Peace Rally ka Jaiñtia Youth Federation (JYF) CB, hajrong i wym bna ka sorkar MDA wei khamtam u Montri ka chnat Puræ Puthi, u Lahkmen Rymbui yei chem chitom kiwa thooh thaw puræ Class XI.
Kam chibynta ini neiliang ka JYF daw pynman ko ya ka Peace Rally ha ka 5 tarik uni u bnai deiwa sdang nadooh Laad Kiang Nangbah College chadooh ka yung krehkaam u DC, Jowai hadien wa kut i e por wow leh iyi da ka sorkar hajrong ini.
I dawa toh wow pynyoh thaw puræ Class-XI ya kiwa 150 ngut ki wym pu yoh thaw puræ deiwa thap ya ki hapoh ka KNGC.
Kamtæ neiliang ka JSM ka kyrchaan ko yei yakhih neidaw wa kani ka phang toh kawa emkaam khamtam ya ki khynnah wa wan na ki manyung wa dooh wa duk, ki wym yoh laad wow lai cha kiwi ki College yong ki bru samen.
Ka seiñ da pynkynmoo ko wa na i por cha i por wa dawa ko ya kawi ka College sorkar ha East Jaiñtia Hills yow yarap ya kiwa chong chnong ka Ri-loom Jaiñtia tangwa ka sorkar hadooh katni da leh khlot ko yeini i dawa.
Puræ leh: Da ka Peace Rally u pynman ka JYF neibynta ki khynnah kiwa ympu yoh Admission
