Ka UK lyngba ka UK Medicines Regulator da mynjur ko yei dawai kuli wa nyngkong hapoh ka ri yow sumaar ya kiwa chah ktah ha ka khlam COVID-19 iwa tip pyrtuid kam ki Molnupiravir iwa toh u e ar sien chi sngi cha kitu kiwa dang dep wot wow yoh ya uni u khñiang.
Ini i dawai toh iwa da pynkhreh nyngkong neibynta i kjut Flu tangwa ye i wow yarap nei chitom yow lait u lai Hospital lane i yap da 50%.
U Health Secretary, u Sajid Javed da ong u wa ini daw pynkylla lut ko ya waroh i jait khamtam kitu kiwa tlot i bor i doh i pran deiwa pynrap wa ka UK toh kawa nyngkong dooh wow e bor wow pynemkaam ya ini dawai pyn ha yung.
I Molnupiravir toh iwa chna da ki Company chna dawai kiwa na US kiwa tip kam ka Merck, Sharp, Dohme (MSD) waka Ridgeback Biotherapeutics wei da man i leh i dawai Covid wa nyngkong wa hoi u ngooid dei ngooid ym toh deiwa Inject.
Ini i dawai toh iwa da dep pyrchang ha ki bru wa da dep yoh tika wa ki wym pu yoh tika yow tip kammon krehkaam i.
Ini i dawai toh iwa hap wow e hapoh 5 sngi wa mih ki dak ki chin wa chitom yow krehkaam bha i.
Ini i dawai krehkaam i deiwa pyndooh ya iwa emkaam u khñiang yow kha pynroi ya idæ yow ye u pynduna yei em uni u khñiang hapoh i doh u bru.
Ka UK kattæ toh kawa da chah ktah biang ha ka khlam heiwa ha ka 3 tarik da em 41,229 ngut kiwa yoh ya u COVID-19 wei da em 217 ngut kiwa yap hapoh 28 sngi hadien wa chem wa yoh ki ya uni u khñiang.
