Ynne ka sngi ka Jaiñtia Students’ Union (JSU) da pynman ko ya ka yalang wow pynkup burom ya ki khynnah kiwa da leh bha ha ki Exam yong ki wei ya kani ka yalang da pynman ha District Library Auditorium, Jowai.
Ha kani ka sngi u MLA ka Jowai, u Wailadmiki Shylla da man u kam u kongsan hei emlang u SP ka West Jaiñtia Hills, u Bikram D Marak, u DSP ka East Jaiñtia Hills, u Jason Mairom, kiwa kitkaam warim ka seiñ wa kiwi kiwi.
U Dolloi ka Elaka Jowai hawa e i klam ha kani ka sngi da e khublei u ya ka seiñ wa da pynman ko ya kam kani ka yalang pynkup burom ya ki khynnah iwa man kam wow e mynsien ya ki wow tia ki sam chaphrang ha ki puræ puthi yong ki.
Da ong u leh wa ini i pynkup burom daw man i kam ka nongmuna ya kiwi ki wow man kiwa minot ha i puræ puthi wa ki kaam yong ki.
U General Secretary ka seiñ, u Treiborlang Suchen hawa e yei klam ha kani ka sngi da ong u wa ka JSU ym man ko du kam ka seiñbhalang tangwa man ko kam ka chlem e sikai kawa da ye wow sai ya ki khroo pyrkhat ha ka imlang sahlang wa ka jylla waroh kawi deiwa e nongmuna ya ki Montri warim ka sorkar jylla, ki Doctor wa kiwi kiwi.
Neiliang u BD Marak hawa e i klam da kyntu u ya ki khynnah wow man ki kiwa minot ha i puræ puthi wei kamjooh leh wow leh wow pyrkhat cha baar yong i puræ puthi wei emkaam leh wow pynkhlan ya i bor pyrkhat khnang wa la ha iwon iwon i kaam daw ye u man kiwa jop.
Da kyntu u leh ya ka seiñ wow bahkhlieh (Adopt) ya ka skur hei wow yarap ya ka wow pynjanai ya i rukom esikai ha ka skur wei wot wow bahkhlieh ya u næ ka khynnah wow yarap ya ki wow poi ki cha ka thong i jop heiyatoh wa ka puræ puthi yong ki.
Kam u kongsan ha kani ka sngi u Wailadmiki Shylla da ong u wa ka JSU daw dap ko 50 snem ha u 2022 wei ki snem ym emkaam ki tangwa ki kaam wa da leh ka seiñ neibynta ka imlang sahlang.
Da ong u wa ini i pynkup burom ymtoh u booh pynyoorong donhi ya ka, tangwa toh ka wow pynkynmoo ya ki wow man kiwa kreh chitom chooh ha i puræ puthi wow poi ki ha ka thong yong i jop neibhah katni da joor bha i yaleh (Competition) wei wow man ki kam ki nongmuna ya kiwi tawon.
Kiwi kiwa da klam ha kani ka sngi toh u DSP, u Jason Mairom, u Nidamon Chullet wa kiwi kiwi.
Ha kani ka sngi da pynkup burom leh ya u Dr. Rev. HH Mohrmen uwa da yoh ya ka PhD na ka Martin Luther Christian University wei kiwi kiwa da chah pynkup burom ha kani ka sngi kynthup ki ya ki khynnah kiwa da pyndep bha ha ki Exam kam ka SSLC, HSSLC, Graduation, Post Graduate wa kiwi kiwi.
