Kam chibynta yong ka “Pan India Awareness and Outreach” wa i dap 75 snem ka ri, namo ka “Azadi ka Amrit Mahotsav” wa chibynta ka Legal Services Week hapoh ka NALSA, ynne ka sngi ka District Legal Services Authority (DLSA), West Jaiñtia Hills District ryngkat i krehlang wa ka yung krehkaam u District Transport Officer, u Superintendent of Police, West Jaiñtia Hills District da pynman ki ya i pynsñiawthooh paidbah hajrong ki kyndon yah kari namo ka “Traffic Rules” ha pchem ka Jowai Police Station.
Ha kani ka sngi ya ka yalang da pynlai da u D. Lamare Legal Aid Council, hei emlang ka R.M. Kharsyntiew, Secretary Cum Judicial Magistrate, u E. Lyngdoh DTO, u E. Rynjah-MVI, u OC ka Jowai Police Station u B.R. Marak wa kiwi kiwi.
U REM Umlong, Traffic Officer da kyntu u ya ki paidbah wow bood ki thij ya ki kyndon yah kari khnang wow lait na iwon iwon i jia wa sñiawsih wa kynthup wym hoi wow yah kari hawa muaid, wow knieh bhah namo Overtake kulmar, u kynmoo wow pyndait ya u Seatbelt, u sap helmet, wei wow dam u pynemkaam Mobile hawa yah kari wa kiwi kiwi de.
Hajrong ka aiñ wa yatoh wa ki kari wa ki kuna neibynta ki bru wa tyngkheiñ aiñ da batai da ka Runa Kya na ka Legal Aid Council.
Kamtæ da kyntu ko wow pynbiang yaki kot ki sla yong ki kari wei u kohngooh yaki kyndon ki aiñ khnang yow lait nei chah pynchitom.
Neiliang u Paila Lyngkot, President ka All Jaiñtia Tourist & Commercial Vehicle hawa e yei klam da ong u wa lada waroh kiwa yah kari bood ki ya ki kyndon ym emkaam de ya ki bru ka aiñ wow mih ki ha sarok waroh chi sngi.
Kamte kyntu u ya kiwa yah kari wow bood ki ya ki aiñ wei wow man kiwa emakor, neibhah wa boonsien i yakhun yaka 10, 20 tyngka jooh wanrah ko i sahkut kari da ki kynta iwa pynthut yei lai i wan ki paidbah.
Da ong haroh u wa kamwa 95% kiwa chong chnong ka Ri-loom Jaiñtia chaniah ki ha ki kari kamai kamtæ nyngkong kiwa yah kari toh u sñiawthooh ki wa kani toh ka khih ka kreh yong i deiwa em i bahkhlieh lym kamtæ ka lai ka wan ym man ko kawa chngaaiñ.
Kyntu haroh u wow em i yakrehlang chirup chirup yow lait nei eh i khoo hei kamai kajih.
