Ya ka Mairang Civil Sub-Division da pynku kyrdan ya ka cha ka District wa pura ynne ka 10 tarik da u Montri Rangbah ka jylla, u Conrad Kongal Sangma ha ka yalang wa da emlang da u Lamphang ka Yung Dorbar, u Metbah Lyngdoh uwa man leh u MLA ka Mairang, u H. Brolding Nongsiej uwa man u Montri ha ka sorkar wa u MLA ka Mawthadraishan, ki Montri sorkar, ki sahep sorkar wa ki pulit najrong kiwa yahkhmat chnong yong ka thaaiñ wei i sakhi yong ki hajar ngut kiwa chong chnong.
Hawa klam ha ka yalang kawa man ha ha Tiehpdang, Mairang, u Metbah Lyngdoh da ong wa i yaklam yei pyrtuid yong ka District wa thymme, ka Eastern West da mih nadooh ka 5 tarik hadien wa ka sorkar da pynbna ko yei pyrtuid, wei pynrap u wa ini i yaklam pynyoo ko wa ki paidbah ka jylla ym emlang ki yei kitkhlieh, tangwa da pynksan u wa itai i pyrtuid toh iwa da bichaar bha neibhah wa toh kawa mih na ka West Khasi Hills wei em ko cha mihsngi (East) yong ka West Khasi. Da ong u wa em i sñiawkhia na kiwa boon ya itai i pyrtuid, tangwa i rai yong ka Cabinet ym man ko iwa bakla.
Hawa klam kam u kongsan ha kani ka yalang, u Montri Rangbah ka jylla da ong u wa i dawa wow pynku kyrdan ya ka Mairang Sub-Division cha ka District toh kawa da slem bha, heiwa da pyntip u wa da yaklam u wa kiwa yahkhmat ka thaaiñ wow pynman noh kam ka District, wei da pynsñiaw u leh wa ynne ka sngi toh ka sngi kawa khroo heiwa da ye wow pynmankaam yei angnood ki paidbah.
Da ong u wa kani ka sorkar MDA ka booh ko ya ki phang wa emkaam ki paidbah hakhmat dooh, la man ha iwon iwon da pyrchang katwa ye wow pyndep, da ong u leh wa ka sorkar MDA man ko ka sorkar neibynta ki paidbah, wei kani ka sorkar ym pynyaphær ko ya ki paidbah ha ki thaw wa em ki la ha Garo, Khasi næ Jaiñtia lane wow pynyaphær yeiwa ngait ki bru.
“Manda lai wai O ya kiwon kiwon ki kaam ha Khasi Hills, da mih kiwa kylli ya ka Garo Hills won, manda lai cha Garo Hills da kylli won ya ka Jaiñtia Hills cheiwon, nga khana O cha phi ki lok wa ka sorkar MDA ym em leh chilliang ko deiwa pait ya ki jaitbru, ka niam lane ki Khasi, Garo lane kiwa na Jaiñtia Hills neibhah katkam wa emkaam i roi i paar da chim yei rai wow lai pynkreh,” da ong u Conrad.
Chooh chooh da ong u wa i rai wow pynmih ya ka District toh neidaw wa emkaam ki paidbah, wei pynrap u wa lada pait ya waroh ki liang ka West Khasi Hills, da man ko kawa sahdien bha, wei ini man ko neidaw wa ki kaam pynroi wa ki thong krehkaam ym poi chadooh ki paidbah, wei da emkaam wow wanrah rap jan ya ka synchaar khadar cha ki paidbah, deiwa wanrah ya ka District. Da ong u wa ka Mairang Civil Sub-Division waroh chi kattu ka em ko du kawi ka Police Station wa kawi ka Police Outpost katwa i thaw man ko kawa heh kamwa 1300 Sq/Km.
Ha iwi i liang u Conrad da pynsñiaw u yei sñiawsih wa em kiwa beiñ yei pyrtuid yong ka District, heiwa da ong u leh wa man ko iwa suk wow beiñ ha ki Social Media, tangwa iwa sakhiat toh iwa da yaklam ya phyllu yumut boonsien wa ki bru chemphang neibynta i pyrtuid, wei i pyrtuid toh kam ka dustur riti wow chim kur naka bei kawa man ka West Khasi Hills. Da pyntip u wa em i e yumut wow e North West tangwa ym yahaap, ka East West leh ym yahaap, tangwa hadien wa da bichaar bniah da chem wa haap ko cha ka Mihngi yong ka West Khasi Hills, wei da e pyrtuid noh da ka Eastern West Khasi Hills.
