Ka JSU da beiñ joor ko ya ka sorkar MDA neibhah wym pait ko ya i roi i paar ka East Jaiñtia Hills kawa man kawi na ki District kawa da jan dap 10 snem ya kawa da phiah ha u snem 2012.
Ka seiñ lyngba ka Khliehriat Circle da beiñ ko ya ka sorkar MDA hanla ka East Jaiñtia man ko ka District kawa khlan dooh u pynmih dan tangwa ka sorkar ym mano ko ya i emkaam ki paidbah ka District.
Ka seiñ da e nongmuna ko ya ka Civil Hospital, ki skur sorkar, College, ki sarok kam na chnong Bataw cha Lama, Borghat cha Hingaria wa Huroi wa kiwi kiwi.
Hajrong kini ka seiñ da e wyrta ko cha ka sorkar wa ymtoh wow leh Politics donhi deiwa phiah ya ki District hapoh ka jylla tangwa ka sorkar toh u wanrah chwa ko ya i roi i paar ha ki District kiwa da rim bar wow pynlut por wow phiah District khlem wanrah yei roi i paar wow pynsuk ya ki paidbah deiwa pynbiang ya ki thaw sumaar wa ki thaw puræ kamjooh ki luti syngkieñ.
Chooh chooh da ong ko wa kamwa man katni ka Civil Hospital kawa em ha Jowai da khynñia ko neibhah kiwa chong chnong na East Jaiñtia Hills ympu yoh ki ya ka Civil Hospital wei ki khynnah na East Jaiñtia ki dang wan ki cha Jowai, West Jaiñtia Hills neidaw wympu biang ki thaw puræ sorkar kiwa paka heiwa da sakhi wa hadooh kini ki sngi dang boon ki khynnah ki wym pu yoh thaw puræ.
