U Montri Rangbah ka jylla Meghalaya, u Conrad Kongal Sangma da pyntip u wa da em i yaklam wa ha ka 16 lane 17 tarik uni u bnai daw em i lai paitlang wa u Montri Rangbah ka jylla Assam, u Himanta Biswa Sarma ya ka thaañ Langpih yow pynyoo wa waroh ar tylli ki jylla ki ya krehlang ki wow pynbait noh ya u pood u ang.
Da pyntip u wa ha itai i lai pait daw emlang leh ki dkhot yong ki Regional Border Committee na waroh ar tylli ki jylla wei hadien ar tayaw hadien itai i lai pait lang, ka sorkar yooluti ko wa ki Regional Committee daw phah noh ki ya ki bui (Report) wa da pynkhreh hachwa wa ki ar jylla u lai ki chakhmat yei pynbait ya u pood u ang.
Kam wow pynkynmoo wa ka Hima Nongmynsaw wa u MDC ka Rambrai-Jyrngam da pynsñiaw ki yei pyrchah yei thmu yong ki Montri Rangbah ka jylla Assam wa Meghalaya wow lai pait ya ka thaaiñ Langpih, neibhah ka Langpih ym em ko ha khappood wa ka Assam, deiwa pynsñiaw wa ka khappood wa ka Assam ka em ko ha Kamphaduli kawa man leh ka chnong kawa em cha wah na ka chnong Langpih.
