U Montri wa pait ya ka chnat i chait i khiah ka jylla, u James PK Sangma da lai pait u ya ka Jengjal PHC ha ka 8 tarik uni u bnai wei i thong toh yow sylli ya kani ka Primary Health Centre (PHC) wa em 10 tylli ki thaw thiah wei wow pynche hajrong ki khubor hamsaya kiwa da poor heiyatoh wa kani ka PHC.
Ya u James da synraan lang da u Principal Secretary ka chnat, u P Sampath Kumar, National Health Mission (NHM) Director u Ram Kumar S, u DMHO ka West Garo Hills, u Deputy Commissioner ka West Garo Hills, u Ram Singh wa kiwi de ki heh sorkar.
Kani ka Primary Health Centre toh ka thaw sumaar kawa da em boon i chah pynbaad wei da mih leh ki pyrchah na ki bru kiwa da dawa yei bai khyndaw wei wow e kreh ya ki i wym em hapoh ka soskular wa ki tre ini i thaw. Ini i kaam da poi i leh cha ka yaleh mukotduma waka High Court, heiwa kiwa yaleh mukotduma da kam ki wa ya kani ka thaw sumaar da e noh ya ka cha ka Seventh Day Adventist Mission.
Hawa klam ha kani ka yalang, u James Sangma da ong u, “Kani ka thaw sumaar u yarap ko ym du ya ki bru ka Jengjal tangwa ya waroh kawi ka ri-loom Garo. Heithaw wow pyrchah, toh u ya krehlang wei wow pdiang yei pyrchang yei wanrah yaki Specialist Doctor na ki thaw sumaar wa pawnaam ka ri kam naka CMC Vellore kiwa da bien wow wan e sumaar wa bha tam ya ki paidbah heiwa ki paidbah ym emkaam ki wow su leh iwa da pait da ka sorkar.”
Da khana u leh wa ka Jengjal PHC toh kawa daw yarap ya ki bru ka ri-loom Garo heiwa heithaw wow lai cha Apollo Chennai lane CMC Vellore daw yoh ki yei sumaar wa kyrpang pyn heini manda pynku kyrdan ka wei da pynlai ya ka da ki Specialized Doctor naka Christian Medical College (CMC), Vellore wow kynthup lang leh ya ki Surgeon wa kiwi de ki Specialist.
U James da kyntait u wa em i thmu wow pynkylla ya kani ka thaw sumaar cha ka 100-Bedded Hospital ka wow pynlai da ka sorkar. “Yow man kam ka 100-Bedded Hospital, ka PHC nyngkong hap wow pynku kyrdan cha ka CHC wa cha kiwi de. Da chimpor da ki phaw snem ya ka Tura Civil Hospital yow man ko kam ka 100-Bedded Hospital,” da ong u.
Heiyatoh won wa da dep e ya kani ka thaw sumaar cha ki Seventh Day Adventist Mission, u James Sangma da ong u, “Kani ka thaw sumaar u em bait ko hapoh ka sorkar, wei da dep e donhi cha ki Doctor ka CMC Vellore yow pait bru ki namo ka Out Patient Department (OPD) lyngba ka SDA Mission deiwa booh kyndon kamwa da leh wa kiwi ki thaw sumaar hapoh ka Public Private Partnership (PPP) neibynta 5 snem.”
U James Sangma da ong chooh chooh u, “Ya kini ki bru wow pynbaad wa i chakri wa daw e ym man de ko kamwa da jooh e ha ki thaw sumaar sorkar toh iwa bakla neibhah da em chwa soo ngut ki Specialist ha ka Jengjal Nursing Home kiwa na ka CMC Vellore wei kini ki Doctor toh kiwa da lehbha yei kaam yong ki yow chakri ya ki paidbah kiwa da wan cha ka thaw sumaar man-ka-sngi.”
Katkam i pynbaad wa ka sorkar ym em ye ko wow e kreh cha ki tre thaw wa kiwa emyatoh ki tre thaw. Tangwa da em 4 ngut kiwa hayung wa kiwa emyatoh kiwa da yoh yei kreh sorkar wei ym em de thung kreh hadien ini. Ka SDA Mission Nursing Home kawa pynkrehkaam da ka CMC Vellore Doctor toh kawa da e yei sumaar wa bha tam hei dor wa duna bha deiwa e sumaar mynkna cha ki manyung wa dooh wa duk wa kynthup lang yei ja.
U Nokma wa emlang ha kani ka yalang da pynche u leh wa ya ini i thaw da e cha ka sorkar khlem da booh kyndon neidaw wa kani ka thaw sumaar daw yarap sumaar ko ya ki bru ka ri-loom Garo.
