U President yong ka Khun Hynniewtrep National Awakening Movement (KHNAM) uwa man leh u MLA ka North Shillong, u Adelbert Nongrum da ong u wa yieñ bait u ha i jooh ka yurim wym chimbynta ha ka lehkmen dap 50 snem ka jylla Meghalaya, hanla ka sorkar da lai ko chakhmat wow yaklam pynbait noh ya u pood u ang wa ka jylla Assam.
Heijooh i por da ong u wa kam uwa mihkhmat ym ye u wow pyrchah bait ya ka sorkar, wei pynsñiaw u yei e yaroh ya ka luti wa da chim da ka sorkar wow pynbait ya u pood u ang, tangwa da ong won wa ym ngait katwa ym pu yoo yei kaam, neibhah wa ini i kaam wow pynbait ya u pood u ang wa ka jylla Assam toh kawa da sahteiñ.
Da ong u wa oo samen da rai bait wym chimbynta ha ka lehkmen 50 snem ka jylla, wei da khut u leh ya ki seiñbhalang næ kiwon kiwon kiwa yahaap i jooh i pyrkhat wym toh u chimbynta, deiwa pynsñiaw wa lada ym em kiwa kyrchaan lang ya ini leh, daw lai u chakhmat samen wow leh iyi iyi yow pynyoo kam i dak wa pyrchah. Da ong u wa kammon u ah Cake heini katwa ki paidbah ha khappood ym chong suk ki.
Ki ar ngut ki Montri Rangbah yong ka Assam wa Meghalaya ha i yachem wow yaklam neibynta wow pynbait noh ya u pood u ang da rai ki wow sdang chwa deiwa pynbait ya ki 6 tylli ki thaw wa rap suk na ki 12 tylli ki thaw wa ya kajia, kitæ ha i bynta wa nyngkong da rai wow pynbait chwa ya ka Tarabari, Gizang Reserve Forest, Hahim, Boklapara, Pilangkata Khanapara wa ka Ratacherra.
Hawa kylli, u Adelbert da ong u wa man iwa eh wow pynbait ya u pood u ang lada e ya oo wow man u Montri Rangbah leh, tangwa iwa emkaam toh wow pynyoo sakhiat yei chimkhia. Da pynsñiaw leh wa da kitbok u yei thmu yong ki ar ngut ki Montri Rangbah wow pynbait chwa ya ki 6 tylli ki thaw wa ya kajia wei kiwa rap suk wow pynbait wei kyrmen u wow poi cha ka thong neibynta wow yoh chong suk ki paidbah ha khappood.
Da ong chooh chooh u wa lada ka sorkar ka sñiawkhia sakhiat ko ya u pood u ang, toh u pynyoo deiwa wanrah yeiwa emkaam ha ki khappood wa khamtam wow booh ya ki Police Out Post wa khlan yow yada ya kiwa chong chnong ka jylla.
U Adelbert da ong u leh wa lada ka sorkar ye ko wow pynbait chwa du 6 tylli ki thaw leh man ko iwa bha wei daw e u yei yaroh, tangwa ya kiwi ki thaw wa dang sah wow pynbait ym toh wow chaniah du ha ka Status Quo neibhah ka krehkaam ko du ya ka jylla Meghalaya katwa ka Assam man-i-por pynthut wei da pynrap u wa emkaam wow em ya ki Out Post ha ki khappood wow e yei yada.
