Ka Meghalaya da rem ko ha ka Manipur, da 174 Run ha ka Men’s U-25 State A Trophy wa pynman ha Guwahati ynne ka sngi.
Ka Manipur da jop ko ya ka kylla khlem wei da Bat nyngkong ko deiwa kamai 281/6 na 50 Over. Hawa jubab, ka Meghalaya dooh lut ko ya ki Wicket deiwa kamai 107 Run na 28.5 Over.
Ka Meghalaya da ka bol da rap khalær ko deiwa e mynkna 37 tylli ki Extra wa kynthup ya 27 tylli ki Wide najrong wa ka Manipur da kamai bha ko deiwa poi 200 Run ha ka 43.4 Over. Ini da kylla i hadien wa haap ka Wicket wa san wei da wan u Bikash Singh uwa na ki 24 bol da ye u wow kamai 62 Run (7×4, 6×4).
Ki le ngut kiwa kawang bol ka Meghalaya kiwa da yoh mar Wicket samen toh u Agreas Chamcham Sangma 2/20 na 10 Over wa kynthup ya 4 tylli ki Maiden, u Mukesh Kumar Ray (2/46) wa u Bibek Poudel (2/60).
U Bikash won da ka bol da pynkthang u ya kiwa Bat ka Meghalaya deiwa yoh 5 Wicket tangwa u Arien B Sangma da ye u wow kamai 26 Run katwa uwa kamai boon dooh ya ka Meghalaya toh u Poudel uwa da Bat hei wa 9 uwa da yoh 27 Run katwa u Ray (16) wa u Abhishek Kumar (11 Not Out) toh kiwi kiwa da yo palat 10 Run.
Ka Meghalaya kattu daw yachem ko waka Assam ha ka 23 tarik.
