U President ka People’s Democratic Front (PDF) uwa man leh u Montri ha ka sorkar Meghalaya Democratic Alliance (MDA), u Banteidor Lyngdoh da dawa u wa u National Vice President ka Bharatiya Janata Party (BJP), u M Chuba Ao toh u paanmaap u hajrong i klam pyndooh burom wa ki seiñ saiñpyrthai ka jylla lai rah Bowl ki cha Delhi wow khrong neibhah da ktah i yei sñiaw yong kiwa chong chnong ka jylla.
Da ong u ka jylla Meghalaya toh kawa haap hapoh ka ri India wei em ki yei hok wa i bhah wow yoh yei yarap lyngba ki Scheme waphær waphær na Delhi. Da ong u wa i klam yong u Ao man ko kamwa klam beiñ ya ki jaitbru ha ka jylla Meghalaya, wei da ong wa ka jylla Meghalaya toh kawi na ki jylla kawa da ku chakhmat wei kawa da paaw bha napyrdi ki jylla ha North East.
U Banteidor da ong u wa ki ar ngut ki MLA ka BJP kiwa emlang ha ka sorkar synrop MDA toh u pynsñiaw ki cha ka Party wa kam kini ki pynbaad næ i klam wei da toh wow kylli chwa yei sakhiat na ka Party ha Meghalaya yow tip iyi wa i kaam wa da lehlang ha ka sorkar neibynta wow kyntu ya ka jylla neibhah u klam khlem da tip ym man iwa miat.
Uwa yahkhmat ka PDF da ong u wa lada wan khlemkaam u cha ka jylla, iwa bha toh wow dam dei wan wei manda wan du wow klam ya iyi wym ye u pdiang toh i wym sñiawsuk iwa pyndooh nong ya ki hi.
